Ikibazo cya Mali, Coup d’états muri Afurika,…Ikiganiro na Philosophe Isaïe Nzeyimana | UMUSEKE

Ikibazo cya Mali, Coup d’états muri Afurika,…Ikiganiro na Philosophe Isaïe Nzeyimana

  • Uwarangaye ntakore Coup d’état mu myaka yahise, ubu iyo ayikoze abura aho ayerekeza,
  • Abatabara muri Mali ntawamenya icyo batabara icyo ari cyo,
  • Gusimburana ku butegetsi ubwabyo ntibihagije.

Prof Isaïe Nzeyimana ni umuhanga muri Filozofiya akaba ayigisha mu Rwanda no mu bihugu byo muri Afuruka y’i Burengerazuba harimo no muri Mali. Twamuhaye ikiganiro ku bibazo bihamaze iminsi, atubwira ko utarakoze coup d’état mu myaka yakurikiye ubwigenge, muri iki gihe ashatse yakwitonda kuko iyo ayikoze ayoberwa icyo iri bumumarire.

Prof Nzeyimana Isaie

 

Ikiganiro kirambuye…

 

UMUSEKE: Guhirika ubutegetsi bikorwa ari uko byagenze gute? Ese ubundi ni imwe mu nzira zemewe za Politiki zo kugera ku butegetsi?

Prof Nzeyimana: Guhirika ubutegetsi ntibyagombye kubaho. Ni ugukemuza ibibazo ibindi!  Ni ugusubiza inyuma politike y’igihugu, cyane cyane ko ubuhiritse aba aje ari mushya muri iyo politiki. Kandi n’ubwo ataba ari mushya cyane muri Leta ahiritse, iyo  asobanura impamvu ze azishingira ku byo abo ahiritse batakoze; ko we atangiriye kuri zero.

Tekereza mu bantu bo hambere, utekereze n’ibibazo biba mu bantu aho buri wese akurura yishyira, buri wese yihanira! Birumvikana ko kubaho muri ibyo bihe byasabaga guhorana ubwoba.

Aha rero ni ho Polititike yavukiye, ihuriza hamwe abantu, imiryango, ibihugu, cyane cyane ariko ibuza abantu gukemuza ibibazo ingufu.

Gukora “Coup-d’Etat muri iki gihe ” ni ugusubira muri ibyo bihe.

Ku rundi ruhande ariko hari inkomoko y’ibyo. Uko abami bakomezaga kubumbira hamwe ibihugu, abafilozofe b’ibyo bihe bashishikajwe no gutekereza  “repubulika” abantu bazabanamo neza.

 Bahereye mu gushyira abaturage b’igihugu mu matsinda:

 -Itsinda ry’abami bazayobora, bo bakarangwa n’ubutabera batazitiwe n’amategeko kandi ntibagire ibyo batunga by’ubukungu,

 -Itsinda ry’abasirikare bazarinda igihugu na repubilika, bo bakarangwa n’ubutwari, na bo ntibagire ibyo batunga,

 -Itsinda ry’abacuruzi n’abanyabukorikori, bo bakarangwa no kwigomwa no kudasesagura, bo bagatunga abandi bose.

Muri rusange ariko ni ko bikimeze kugeza ubu. Ibi ariko bisaba ko buri wese yaba agumye mu itsinda rye.

Abaturage n’igihugu bagombaga kongera ubukungu kuko nabwo ari nyirabayazana y’ibindi bibazo.

Abafilozofe bababoneye ingingo yoroshye. Babasaba  gukora cyane, bakarya, bagatungwa na bike.

 Erega burya abahirika ubutegetsi bagira aho babikomora!

 Mu bihe bya mbere, abantu biyumvishije ko ubutegetsi buturuka ku Mana, imico ya gakondo ikabishimangiza imihango itandukanye; icyo gihe guhirika ubutegetsi byabaga ari amahano.

Guhirika ubutegetsi bukomoka ku Mana byabaga ari amahano kuko byabaga ari uguhangara ubutegetsi yashyizeho, bigasa no kuyikora mu jisho.

 Hashize indi myaka, birahinduka, bemeza ko ubutegetsi budaturuka ku Mana, ahubwo ku ngufu n’amayeri, ko ari nako ubutegetsi bugomba gukoreshwa.

 Muri ibi bihe, abantu bemeje ko ubutegetsi buturuka ku baturage, ari na boba nyirabwo. Ubu aho niho ibibazo bikiri. 

UMUSEKE:  Abahirika ubutegetsi bakunze kuba ari abasirikare. Kuki abasirikare bivanga mu bibazo bya politiki kandi bashinzwe kurinda ubusugire bw’ibihugu byabo?

Prof Nzeyimana: Erega burya ikintu abantu batazi ni uko kuva na kera abasirikare bahoze muri Politiki ndetse kurusha uko bimeze ubu! Muri iki gihe  bajyenda bayivamo uko ibinyejana bigenda bikurikirana.

Mu miterere y’imiryango y’abantu n’ubutegetsi, imirimo yahoze ivanze, buri wese akora byose : Umwami ari umunyapolitike, ari umusirikare, ari ku rugamba, ari umwigisha, ari umukuru w’idini, ari we wemeza imico agakuraho indi, ariwe mucamanza mukuru, ariwe ubazwa iby’ubukungu kandi n’ubukungu bwose buri mu bihugu bukaba ari ubwe,…

Uko imiryango igenda yaguka, ibinyejana bihita, imirimo ihinduka imyuga ya ba nyirayo, abantu bagenda bagabana imirimo, buri wese akamenya umurimo we. Muri uwo mujyo abasirikare nabo bamenye umurimo wabo.

 Ku rundi ruhande, ubutegetsi ni amasezerano « contrat » hagati y’abaturage n’ubutegetsi. Mu masezerano habamo n’ingufu zizakoreshwa kuri buri ruhande mu gihe amasezerano atubahirijwe.

Ku ruhande rw’ubutegetsi na Leta, hari amategeko, ingufu za gisirikare na polisi, ubukungu, ubumenyi n’ubuhanga bunyuranye.

Muri iyo “contrat”, hagati ya Leta n’abaturage, kumenya nyiri izo ngufu, bisaba kumenya urwego politike igezeho itera imbere.

Mu bitekerezo, kuko ubutegetsi ari ubw’abaturage, n’izo ngufu ni iz’abaturage. Hari ariko aho bigera Leta n’abaturage ntibabe bakivuga rumwe.

Aha ni ho za Coup d’Etat zivukira! Ibyo kandi abakora Coup d’Etat barabizi: aho zimaze iminsi ziri, zishorwamo abaturage.

Ibyo na byo bisaba ko abaturage baba bifitemo ubushobozi bwo gushishoza no kuba maso ariko ubu bushobozi buba bunini cyangwa buto bitewe n’urwego uburezi bugezeho mu gihugu runaka.

UMUSEKE: Mu bitekerezo by’abahanga muri Politiki babayeho, haba hari ibishingirwaho n’abantu bahirika ubutegetsi? Bibaye bihari byaba ari ibihe?

Prof Nzeyimana: Guhirika ubutegetsi nta mpamvu n’ibisobanuro byagombye guhabwa. N’iyo haba hari ibibazo si cyo cyaba igisubizo. Ubutegetsi ni manda. Bugira uko butangira, icyo buzakora n’igihe iyo manda izamara. Ni na yo mpamvu Leta ziha ubutegesti  manda y’igihe gito, ahenshi ni hagati y’imyaka itanu (5) n’irindwi (7), kugira ngo n’iyo ibibazo byavukira muri iyo manda bigire uko byakwihanganirwa, mu gihe gito kiba gisigaye ngo manda irangire.

Ikindi, Leta ntiyagombye kugira ibibazo bikabije ku buryo igomba kumeneshwa ku ngufu, ngo na byo byegekwe ku muntu uhagaririye ubutegetsi. Ikirinda uhagarariye ubutegetsi ni ugukorana, gufatira ibyemezo hamwe, gufatira imirongo migari y’igihugu hamwe, na yo yaganiriweho n’impuguke n’izindi nzego za sosiyete, guha inzego ubusugire no kwisanzura bihagije, mu mbibi z’imirongo migari ya politike zinyuranye n’amategeko.

Hari ibihugu byo muri Afurika bigifite inzego zo hambere z’umuco. Zigira amazina anyuranye « chefs religieux, roi, chef suprême religieux»; ni abakuru b’imiryango ishingiye kuri gakondo y’ibihugu byabo.

Izo nazo ni izindi mbaraga Leta yakwifashisha. Ikibazo cyose cyavukira hamwe muri iyo mikoranire cyagira uko gifatwa, nticyakwegekwa k’uhagarariye ubutegetsi.

Ku bindi bibazo byaba bikabije, igisubizo cy’ibanze cyaba gutegereza ko manda irangira. Ku bindi byaba bikabije cyane, hateganyijwe inzego z’amategeko z’ikirenga zigena uko ubutegetsi bujyaho n’uko buhagarikwa.  Nta rugero rw’Itegeko Nshinga ruteganya uburyo bwa « coup d’Etat » mu gusimburana ku butegetsi.

UMUSEKE: Tugaruke muri Afurika. Kuva abakoloni batangira kuva mu buryo buziguye muri Afurika,  za coup d’états zavuzwe henshi, ndetse hari iherutse kuvugwa muri Mali. Mubona zizagera aho zicike kuri uyu mugabane?

Prof Nzeyimana: Hari intambwe igenda iterwa n’ubwo yaba  iri mu nzira mbi bwose. Leta za mbere zo muri Afurika zavanyeho abari barakoronije Afurika; ahenshi byakozwe mu mvururu.

Ubutegetsi bw’izo Leta zigenga, ahenshi ntibwatinze, bwavanyweho na za coup d’Etat n’imvururu ndetse n’ubwicanyi buhoraho. N’ubwakurikiyeho  byabaye uko, ahubwo ukoze coup d’Etat akitwa intwari.

Nyuma haje icyiciro cy’uko n’ukoze coup d’Etat yihutira gukoresha amatora kugira ngo byibagirane ko ubutegetsi bwe bushingiye kuri coup d’Etat.

Ubu bigeze aho, uwarangaye ntayikore muri ibyo bihe yashobokaga, iyo ayikoze asigaye abura aho ayerekeza, bigeze aho guhita yiyita Perezida bisigaye bimutera ubwoba buvanze n’isoni. Birashoboka ko igihe cyo gufata ubutegetsi muri Afurika ku ngufu, izo arizo zose, kiriho kirarangira.

UMUSEKE: Ni ibihe bibazo mubona byazahaje Mali ku buryo kuyubaka no kuyigaruramo umutuzo bikigoranye kugeza ubu?

Prof Nzeyimana: Icy’ibanze ni uko ibibazo biri muri Mali ubu bidakwiye kwibagiza ibyiza Mali yifitemo. Kuva mu kinyejana cya 13, yari ingoma yagutse « Empire Mandingue », yashinzwe na Soundiata Keïta uvugwa nk’inkuru y’umugani ariko amateka avuga ko ashobobora kuba yaranabeyeho.

Soundiata azwiho ko ari we wahuje ibihugu bye, kugeza aho agirwa « Umwami w’Abami/Mansa »; «Empire Mandingue» yari ihuje Mali y’ubu, Guinée, Gambie, Burkina-Faso, Côte d’Ivoire na  Mauritanie.

Soundiata kandi Azwiho gushyira mu buryo ibihugu: yari yarashyize abaturage be mu bwoko butatu: Abikukiye bigenga, abapfumu-abanyarwenya, n’abanyabukorikori.

Intego n’inkingi z’ingoma ye, zari amahoro, ubukungu n’ubwigenge, dore ko no mu mvugo igenekereje Mali, « Mandé », cyangwa Manden », bivuga gutera amahirwe, aba-maliens cyangwa « Malinké », bo bakaba abatera amahirwe; mu mico iranga ibyo bihugu n’ubu bafite imvugo n’umuco « AKWABA », bishatse kuvuga « Urisanga », ahandi ni «l’étranger est roi » bishatse nabyo kuvuga ngo « Urisanga, umunyamahanga ni umwami».

Nkanjye ukunda kugenda muri biriya bihugu kwigisha Philosophie nabonye ko iyo unyuze ku bahatuye bari gufungura cyangwa banywa baravuga bati: “Je vous invite”/ Nawe ndagutumiye.”

Bisa n’aho iwabo batajya bavumba! Buri wese aba ari umutumirwa!  “AKWABA” si imvugo gusa, iyo uhari urabibona, uranabigirirwa.

Naho ku bindi bibazo Mali ifite, biri ku nzego zinyuranye. Hari ibiri ku rwego rw’akarere ka Sahara Mali iherereyemo; hari ibiri ku rwego rw’ibihugu n’imiryango mpuzamahanga iri muri ibyo bibazo, hari n’ibiri imbere muri Mali.

 Kuri buri rwego ni naho habarizwa uko ibibazo bihari byahakemurwa.

Ibibazo bya Mali nabyo bikomoka mu karere ka Sahara.

Imvururu zo muri Algérie zimaze guhosha, hari imitwe y’abasirikare yahungiye muri Sahara, yinjira no muri Mali.

Aho ubutegetsi bwa Libya  buhirikiwe, hari imitwe y’ingabo yahise ijya kwiyegeranyiriza muri Sahara ; n’ubusanzwe muri iyo mitwe hari n’ubundi iyari yarakoranyirijwe inakomoka muri Sahara.  Ibyo byoroshywa n’ imiterere ya Sahara aho usanga imiryango ihatuye itagira imipaka, ibarizwa mu bihugu hafi ya byose bituye kariya gace kitwa Maghreb.

 Muri ibyo bibazo by’imitwe y’ingabo, Leta zagombye kuyiburizamo zagotewe hagati: kugirana ibiganiro n’iyo mitwe cyangwa kuyirwanya ku mugaragaro biranga. 

 Muri ibyo byombi, icyo Leta yahitamo cyose cyayikwegera ibibazo.

Abatabara muri Mali nabo ntawamenya icyo batabara icyo ari cyo, kuko mu bihugu bituranye nayo hari ubukungu nabwo buteye ipfa : hari Uranium  ya Niger, peteroli ya Nigeria na Tchad, Gaz ya Algérie, …

Ibyo nabyo byiyongeraho  ko muri Sahara habaye indiri y’urujya n’uruza rutagira imipaka : abimukira bahanyuzwa cyagwa bahasubizwa, abahagurishirizwa, abafata abandi bugwate, abashimuta abandi bakabinjiza mu mitwe y’ingabo, imbunda zihanyanyagiye zagiye zituruka mu mirwano ihabera, kuba hashobora kuboneka inzira zoroshye zahuza Amerika y’Epfo, Uburayi na Aziya ; kuba hari abasirikare babitojwe n’ibindi.

Mu kongerera ubushobozi ingabo za Leta z‘bihugu biri muri izo ntambara, abitandukanyije n’igisirikare cya Leta ntibabura gucikana  ubuhanga n’ubushobozi babaga bamaze gutozwa.

Kuba imitwe ya gisirikare iharwanira itandukanye mu miyoborere : hari iyo usanga ari y’umu -Général ku giti cye cyangwa ari iy’urwego ruhuriye hamwe,  iyo mitwe nayo hari igihe isubiranamo, hari n’igihe abasirikare bivumvumbagatanya ku mu-Général cyangwa umutwe umwe bakajya ahandi.

Muri urwo rusobe harimo n’urw’ibihugu n’imiryango mpuzamahanga  ihatabara, ku buryo kuyikoreshereza hamwe ngo idasobanya na byo bitorohera Leta zihoraho udutero.

Muri Mali imbere harimo  ibibazo bigeretse ku bindi: ku ntambara hagati ya Mali n’imitwe iyirwanya, hazamo n’imvururu n’imirwano hagati y’amoko y’imiryango, na yo itagira imipaka, aho usanga nk’ubwoko bumwe buri muri Mali, Niger, Burkina Faso, Libya, Maroc n’ahandi.

Mu biganiro, ibyo bose bamwe basaba abandi ntibyoroshye guhurizwa hamwe.

Mali ituwe n’igice kinini cy’abaturage b’abayisiramu bahuriye muri Leta igendera ku mahame adashingiye ku idini “Etat Laïc”, naho mu bayirwanya bo hakabamo abashaka ko Leta igendera ku mahame ya Islam, ku buryo biri no mu nyito zabo.

Ibyo bigasabwa kandi mu gihe ibihugu n’imiryango bitabara muri Mali, ibyinshi bigendera ku mahame ya Leta idashigiye ku idini “Etat laic”; ibyo kandi bikaba ngo ari uko ingabo z’u Bufaransa n’izindi bafatanyije zigomba kuba zarahavuye.

Ingingo itarazamo ni irebana n’ikibazo cy’ibyaha byahakorewe by’ubwoko bwinshi, ku baturage b’ibihugu binyuranye ndetse n’iby’impunzi ziri muri kariya karere ariko nabyo bizatinda bibazwe.

Ku cyegeranyo cy’amahame y’imitwe ihanganye muri Mali, harimo Leta igomba kuvaho hagashyirwaho indi, hari demokarasi, hari imibereho y’abaturage, hari leta ishingiye ku idini rya Islam. Guhuriza hamwe ibyo bishingirwaho ibiganiro, bisaba izindi mbaraga zitari iza gisirikare gusa.

UMUSEKE : Ubufaransa bufite ingabo muri Mali mu cyo bwise Opération Barkhane. Ziriya ngabo zizashobora guhashya abarwanya Bamako, n’ibindi bihugu bigize Maghreb?

Prof Nzeyimana : Kuva Machiavel (Nicollò Machiavelli wabayeho guhera muri 1469 -1527) yakwihaniza Leta gukoresha ingabo zitari izayo, nta gihugu cyarangiza intambara mu kindi, nta n’igihugu cyarangirizwa intambara n’ikindi; ingabo z’indi Leta zishobora gutera agahenge, ariko k’akanya gato.

Ni byo bihora muri Mali, abahangaye na Leta ya Mali n’izindi ngabo zitabara zo muri Maghreb birukanwa hamwe, bakajya ahandi, bakaba bategereje, nyuma, aho birukanywe bakazahagaruka.

Ibyo si umwihariko muri biriya bihugu bya Sahara gusa,  ahubwo ni ko imirwano irimo ingabo z’intirano ihora.

Ibibazo bya Mali si iby’intambara, si iby’igihugu gitera ikindi, ntibyakiranurwa no gutabara. Intambara yo gutabara abaturage ubatabarisha Leta itari iyabo, iyo ntambara ni inyuza ibibazo ku ruhande, kimwe n’uko gutsimbarara ku ntambara hategereje uzayitsinda ari ugushaka guheza ibibazo muri Sahara.

UMUSEKE: Hari umuhanzi wo muri Côte d’Ivoire witwa Tiken Jah Fakoly waririmbye indirimbo yise ‘Quitte le Pouvoir’ avuga ko igihe kigeze ngo abantu bereke kugundira ubutegetsi. Namwe ni ko mubibona?

Prof Nzeyimana: Kureka kugundira ubutegetsi ntibyakemurwa nuko byaririmbwe mu ndirimbo ya runaka.

Abayobora Leta baba ari bamwe mu baturage,  baba baturuka mu baturage. Achille Mbembe umuhanga muri politike za nyuma y’ubukoloni, we avuga ko gusimburana ku butegetsi, ubwabyo gusa bidahagije, ko hagomba na gihamya cy’uko uje ari mwiza, ashoboye kurusha ugiye.

Mu bihugu bya Afurika, hari gahunda y’ibihe birebire yanatangiye, mu nzego zinyuranye z’uburezi, z’imiyoborere iboneye, z’ubukungu…

Mu mvugo y’abahanga ba politike bavuga ko ngo abaturage bagomba kugira  ubutegetsi bubakwiye.

Umuyobozi uri ho ni indorerwamo y’abaturage be, niba abaturage bashaka kwireba, ni we bakwireberamo, nk’uko na none abaturage ari indorerwamo ubabayobora yirebamo. Intego za politike z’imiyoborere iboneye ni aho zerekeza: kurema abaturage bavamo banashyiraho abayobozi babakwiye.

UMUSEKE: Nta bwoba buhari bw’uko ibya Mali bitagiye mu buryo vuba byazateza akavuyo nk’aho  muri Libya y’ubu?

Prof Nzeyimana: Ibibazo biri muri Mali bishobora kwimukira n’ahandi muri Sahara, cyane cyane kubera imiterere yaho n’imiterere y’abahatuye bashobora kwisanga hose. Si ibibazo byakemurirwa mu ntambara kuko aho kwimurira imirwano harahari, si ibibazo by’idini.

Uwashaka kubiheza muri Sahara yakomeza kubyita iby’intambara n’idini. Bizasaba kubirebera mu buryo bwagutse, no kubikemurira hamwe muri ubwo buryo bwagutse.

Ni ibibazo bya sosiyete byabarizwa mu ngingo zimwe na zimwe: hari ibijyanye n’ubukungu bw’abaturage bwahoze bushingiye ku bworozi no ku buhinzi mu karere ubu k’ubutayu n’ihindagurika ry’ibihe, na politike na « technologie » y’ubuhinzi n’ubworozi bisaba guhuzwa n’ibyo bihe.

Hari ibishingiye ku bana b’ingimbi bacikiriza amashuri bagahugira ku bucuruzi bwinshi buri mu migi no mu nkengero zawo « économie ambulante et informelle ».

Hari ibishingiye ku bakuru b’imiryango « chefs culturels et religieux » bagenda batakaza ijambo kuko ibyabahaga ijambo, ari byo ubukungu bwari  bushingiye ku mashyo y’amatungo bugenda bugabanuka, kuko kandi n’imico gakondo n’idini bashingiragaho nabyo bigenda bigongana n’impinduka z’akarere barimo.

Hari ibishingiye ku butegetsi « administration » busabwa kugera hose…. Ibyo byose byorohera imitwe y’ingabo kubona abayoboke mu baturage bamwe bafite ubwoba.

Gukemura ibibazo byo muri kariya karere bizasaba kugaruka imbere mu baturage batakaje aho bakuraga ingufu zabo zo kwihaza mu bukungu, batakaje ubushobozi bwo kwikemurira ibibazo mu miryango bakoresheje idini n’umuco wubahishaga abakuru, bakegerezwa bihagije ubuyobozi (administration) hafi.

Hari ibyashingirwaho: uburezi, amadini, imiryango, ubutegetsi, amategeko aganira n’imico …

Ariko nabyo bigakorwa cyane cyane na ba nyirabyo. Kuko n’ubundi muri Sahara hari imishinga izi ibyo bibazo, ariko uburyo iyo mishinga ikora, birashoboka ko ikomeza kwitwara nk’ikoresha inkunga zo hanze zaje guhosha ibibazo by’intambara.

UMUSEKE : Turabashimiye

Prof Nzeyimana : Nanjye ndabashimye !

Jean Pierre NIZEYIMANA
UMUSEKE.RW

4 Ni byo bitekerezo bimaze gutangwa

  • Impamvu Coups d’état zitakiba muli Africa,nuko presidents benshi bafata ubutegetsi ku ngufu,bagashyiraho Presidential Guard ifite ingufu kurusha regular army (armament,training).Ibyo bigatuma President bamutinya cyane,agakora icyo ashatse.Izindi nzego,cyanecyane Parliament,zikaba gusa izo guhembwa ibifaranga byinshi z’izindi benefits.

  • Ngo kuki Abasirikare bakora Coup d’état kandi bashinzwe kurinda igihugu? Mu bihugu byinshi,abasirikare barinda inyungu za president n’abantu bake b’inshuti ze,aho kurinda igihugu.Intambara ziba,usanga abasirikare baba barwanira agatsiko k’abantu gusa cyangwa ubwoko (Civil Wars).Niko byagenze mu ntambara nyinshi za DRC,Uganda,Burundi,Tchad,Sudan,etc…Kuzita ko ari “ingabo z’igihugu”,ntabwo ari byo.Muribuka ejobundi muli Uganda,abasirikare bajya gukubita Abadepite banze gutora itegeko rigumisha ku butegetsi Museveni.Intambara z’iki gihe usanga ari abenegihugu bisubiraniramo gusa.Nta ntambara z’ibihugu zikibaho.

    • Kuki utondagura ibindi bihugu ntushyiremo u Rwanda ubwo bwoba nubwiki?

  • Iyo uvuze ngo gusimburana singombwa ngo abaturage babagomba kuyoborwa nuwo indorerwamo yabo ibereka. Dufashe ibihugu bimwe na bimwe abaperezida bagiye bajyaho bakoresheje imbunda abo baturage babonye igihe cyo kumwihitiramo? Iyo ahageze se ugasanga birirwa bamuririmba nkuko baririmbaga uwo yavanyeho abo baturage koko baba bagifite uburenganzira bwiyo ndorerwamo uvuga cyangwa bakoma amashyi kugirango buke kabili? Cyane ko babona uko bigendekera ugerageje kuva kuruwo murongo?

Subiza

Your email address will not be published. Required fields are marked *