Intara y’Amajyepfo: Ku munsi umwe abaturage bishyuye miliyoni 1.7Frw y’amande kubera kutirinda Covid-19 | UMUSEKE

Intara y’Amajyepfo: Ku munsi umwe abaturage bishyuye miliyoni 1.7Frw y’amande kubera kutirinda Covid-19

Ukeneye kwamamaza! Gusobanuza! Gutanga amakuru? Hamagara 0788772818

Ubuyobozi bw’Intara y’Amajyepfo buravuga ko amafaranga bwaciye abantu barenze ku mabwiriza yo kwirinda icyorezo COVID -19 ari menshi yagakwiye gufasha Abanyarwanda kwiteza imbere ubwabo.

Mu Karere ka Nyanza honyine hafashwe abantu 77 barenze ku mabwiriza yo kwirinda Covid-19

Ku wa 28 Nyakanga 2021 mu Ntara y’Amajyepfo hafashwe abantu barenze kumabwiriza yo kwirinda icyorezo COVID -19 harimo 297 batambaye udupfukamunwa neza, 129 batahanye intera ihagije, 230 barengeje amasaha yo gutaha, abantu 4 bakomeje gukora ibikorwa byabo amasaha yo gufunga yarenze n’abashoferi 28 batwaye ibinyabiziga amasaha yarenze.

Abo bose bigishijwe ariko abantu 141 binangiye bacibwa amande kuko bari banafatiwe mu makosa inshuro zirenze imwe.

Guverineri w’Intara y’Amajyepfo Kayitesi Alice yavuze ko mu ijoro rimwe ryo ku wa 28 Nyakanga 2021 baciye amande ya abaturage agera kuri miliyoni 1.7Frw.

Ati “Ni amafaranga menshi yagakwiye gufasha Abanyarwanda kwiteza imbere ariko bayatanze mu mande kubera ko bigishwa bagakomeza bakabirengaho.”

Guverineri yakomeje yibutsa abantu ko ari ngombwa kubahiriza amabwiriza yo kwirinda icyorezo COVID-19 kuko iyo umwe ayarenzeho bikururira akaga n’abandi.

Ati “Turabasaba kwirinda gukora ibikorwa bitemewe ndetse no gukomeza kubera ijisho buri wese mugenzi we kuko utambaye agapfukamunwa bigira ingaruka bityo buri wese abigire ibye.”

Intara y’Amajyepfo igizwe n’Uturere 8 kamwe muri two kari muri gahunda ya Guma mu rugo, mu gihe Imirenge 25 na yo yashyizwe muri gahunda ya Guma mu rugo.

Abafatwa barenze ku mabwiriza yo kwirinda icyorezo COVID-19 bacibwa amande bakigishwa bakanasabwa kwipimisha icyorezo biyishyuriye.

Guverineri w’Intara y’Amajyepfo Kayitesi Alice asaba abaturage kubahiriza amabwiriza yo kwirinda Covid-19 kuko amafaranga bacibwa yakabaye abafasha gukora ibindi

REBA YouTube Channel UMUSEKE TV video nziza nk’iyi. UKORA LIKE SHARE na COMMENT

 

Theogene NSHIMIYIMANA
UMUSEKE.RW/AMAJYEPFO

1 Rikumbi nicyo gitekerezo kimaze gutangwa

  • Kuki amabwiriza ya gumamurugo adahabwa agaciro? Ukuri kurahari n’ubwo kulyana. Leta ikwiye guhindura imikorere. Aho gushyira imbere ibihano bikakaye, nishyire imbere inyigisho. Abantu bagombye kugira ikibazo icyabo, kwumvako barengera amagara yabo. Naho gushyira imbere ingufu – gufunga no gukubita – n’ibihano nko kuraza abantu mu mbeho muri stade no kubaca amafaranga, ntibishobora gutanga umusaruro unoze.

Subiza

Your email address will not be published. Required fields are marked *