Intego yo gutsinda Libya yatumye umutoza w’Amavubi Antoine Hey ava ku izima – UMUSEKE

Intego yo gutsinda Libya yatumye umutoza w’Amavubi Antoine Hey ava ku izima

Umukino w’umunsi wa gatatu w’amatsinda ya CECAFA Senior challenge 2017 uteganyijwe kuri uyu wa kane. Amavubi arasabwa gutsinda ikipe y’igihugu ya Libya ngo akomeze kugira ikizere cyo gukomeza muri ½. Umutoza Antoine Hey yari yatangaje ko azakomeza guhinduranya abakinnyi agamije kubagerageza ariko byahindutse, azabanzamo ikipe ya mbere.

Antoine Hey yemeye guhindura politiki ye kuko ashaka intsinzi byanze bikunze

Antoine Hey yemeye guhindura politiki ye kuko ashaka intsinzi byanze bikunze

Amavubi y’u Rwanda niyo kipe ihagaze nabi kurusha izindi mu  irushanwa rihuza amakipe y’ibihugu by’impuzamashyirahamwe y’umupira w’amaguru mu karere ka Afurika yo hagati n’Uburasirazuba ‘CECAFA 2017’ Umuseke ukomeje gukurikirana muri Kenya.

Abakinnyi ba Antoine Hey batsinzwe imikino ibiri ibanza na Kenya na Zanzibar. Basigaje imikino ibiri bazahanganamo na Libya ejo tariki 7 Ukuboza 2017 saa 16h, na Tanzania uzaba kuwa gatandatu tariki  Ukuboza 2017 kuri Kenyata Stadium yo mu mujyi wa Machakos.

Ku mugoroba w’uyu munsi bakoreye imyitozo ku kibuga kitanogeye ijisho bagenewe n’abateguye irushanwa, ikibuga cy’ikigo cy’amashuri ‘Machakos Academy Primary School’.

Imyitozo byagaragaye mo ko uyu Mudage utoza Amavubi yavuye ku izima akareka guhinduranya abakinnyi azakoresha nkuko yari yabitangaje, ahubwo ahitamo kuzabanza mu kibuga ikipe yasezereye Ethiopia mu gushaka itike ya CHAN, aha aba abakinnyi inshingano yo gushaka intsinzi byanze bikunze nkuko Umuseke wabitangarijwe na Ndayishimiye Eric Bakame.

“Imikino ibiri ishize ntabwo twitwaye neza ku buryo navuga ko tudahagaze neza muri rusange. Ni umukino twiteguye neza kandi twahaye agaciro kuko tuzongera kugaragara mu kibuga nk’abakinnyi babashije kuruhuka ntidukine umukino ushize. Twashyizemo imbaraga byo ku rwego rwo hejuru ngo turebe ko twabona amanota atatu.”

Avuga ku ikipe y’igihugu ya Libya bazahangana yagize ati:

“Kugera aka kanya nayo (Libya) nta gitego iratsinda muri CECAFA. Urumva ko ari ikipe nk’izindi. Umukino twawuhaye agaciro kuko nabwo nabo bari ku rwego rwo hejuru cyane. Turamutse dutsinze twajya hejuru yayo niyo mpamvu tugomba kwitegura nezankuko twabisabwe n’abayobozi bacu baje kutuganiriza ejo.”

Antoine Hey nyuma yo gutsindwa na Zanzibar akavuga ko atababaye kuko akomeje kugerageza abakinnyi, yongeyeho ko azakoresha abandi bakinnyi batarabona umwanya barimo Nzarora Marcel usanzwe urindira Police FC ariko yavuye ku izima arabihindura.

Imyitozo ya none yakozwe n’abakinnyi 22 barimo Manzi Thierry wari wagize ikibazo cy’imvune mu mukino batsinzwe na Kenya, na Kayumba Soter ugomba kugaruka mu kibuga nyuma yo gusiba umukino wa Zanzibar kubera ikarita itukura. Mu bakinnyi bakoze ntabwo harimo Emmanuel Imanishimwe utazongera gukina imikino ya CECAFA kubera ikibazo cy’imvune.

Abakinnyi bashobora kubanza mu kibuga Amavubi ahangana na Libya

Umunyezamu: Ndayishimiry Eric Bakame.

Ba myugariro: Faustin Usengimana, Manzi Thierry, Kayumba Soter.

Abakina hagati: : Iradukunda Eric Radu, Yannick Mukunzi, Bizimana Djihad, na Rutanga Eric.

Ba rutahiza: Manishimwe Djabel, Mico Justin na Biramahire Abeddy

Aba nibo biteganyijwe ko bazabanza mu kibuga

Aba nibo biteganyijwe ko bazabanza mu kibuga

Manzi Thierry wa mbere ibumoso wari wagize ikibazo cy'imvune yakoranye imyitozo na bagenzi be

Manzi Thierry wa mbere ibumoso wari wagize ikibazo cy’imvune yakoranye imyitozo na bagenzi be

Imyitozo yakorewe ku kibuga cy'ikigo cy'amashuri

Imyitozo yakorewe ku kibuga cy’ikigo cy’amashuri

Gutsinda umukino wa Libya niyo ntego ubu

Gutsinda umukino wa Libya niyo ntego ubu

Roben  NGABO (Machakos-Kenya)

UMUSEKE

3 Comments

  1. Kalisa

    07/12/2017 at 5:07 am

    Hahahaaa! Ubundi se uyu mudage yari mu maki? Bambwibutse ko ririya ari irushanwa kandi ko mu bisanzwe no mu muco Abanyarwanda banga gutsindwa no kwandagazwa uretse amaburakindi…

  2. titi

    07/12/2017 at 7:36 am

    ariko ubundi uyu mutoza ko numva afata ibintu akabyoroshya, aribwira ko Amavubi adatsinze zanzibar azagera hehe imbere yibihangange nka za senegal na za ghana muri chan, yewee reka tubitege amaso, utazi umudage aramwizera

  3. nge

    07/12/2017 at 1:27 pm

    nimba arikudukinira comedy byaracanze

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017