Kigali: Uwabaye mu kato ka Covid-19 avuga ko nta we ukwiye kumwishisha | | UMUSEKE
  • 05/07/2020 2:57 21

Kigali: Uwabaye mu kato ka Covid-19 avuga ko nta we ukwiye kumwishisha

Umwe mu baturage bashyizwe mu kato (quarantine) akekwaho guhura n’abanduye Covid-19 witwa Venuste  avuga ko ari mu bantu ba mbere bagashyizwemo ubwo yari avuye Tanzania. Avuga ko babayeho neza, barya, bakaraba, bavurwa bityo ko nta we ukwiye kubagendera kure.

Avuga ko  ubwo yari ageze i Kirehe ahitwa Gatore, we na bagenzi be bahise bashyirwa mu kato.

Ati: “Njye nagiyeyo mu isibo ya mbere ubwo nari mvuye i Dar es -Salaam.  Nageze mu Rwanda taliki  22, Werurwe 2020. Tuhageze dusanga gahunda ni uko iteye natwe twubahiriza gahunda. Mu isibo ya mbere twari abantu 134.”

Avuga ko we na bagenzi be bamaze ibyumweru bitatu mu kato, ariko akavuga ko byatewe n’uko nta bikoresho bihagije byo gusuzuma no kwita ku banduye cyangwa abari mu kato (quarantine) byari bihari.

 

Ubuzima bw’abari mu kato ni bwiza…

 Uyu mugabo usanzwe ari umushoferi w’amakamyo avuga ko aho bari bacumbikiwe babayeho neza.

Baryamaga ku bitanda bikomeye, bifite matelas, amashuka mashya hamwe n’ayo guhinduranya, mu cyumba babamo bakagenerwa umuti w’amenyo, aho kwiyuhagirira n’ibindi.

Buri gitondo bajyaga gusuzumwa na Muganga kandi abafite indwara runaka bakitabwaho.

Avuga ko Ibitaro bya Kirehe byari byarashyize poste de santé aho babaga kugira ngo bajye bavurwa igihe cyose bibaye ngombwa.

Avuga ko nyuma y’ibyumweru bitatu, bose uko ari 134 batahiye rimwe kandi bameze neza.

 

Uvuye mu kato nta we ugomba kumwishisha

Venuste avuga ko ageze iwe abaturanyi bamwakiriye neza, kuko mbere akiri mu kato yari yarababwiye uko byamugendekeye.

Ikindi yemeza ko cyatumye abaturanyi be batamwishisha ni uko yari afite ikemezo yahawe n’Abaganga kemeza ko basanze nta Covid-19 afite.

Asaba Abanyarwanda kumva ko umuntu wagiye mu kato kubera kumukekaho Covid-19 atagomba guhabwa akato kuko iyo avuyeyo aba afite ibyemezo by’uko nta kibazo ateje.

Ku rundi ruhande avuga ko umuntu utarasuzumwa ari we ugomba kwitonderwa.

Ikigo cy’igihugu gishinzwe ubuzima, Rwanda Biomedical Center (RBC), kemeza ko gushyira abantu mu kato bitemeza ko aba arwaye Covid-19 byanze bikunze, ahubwo ko biba biri mu buryo bwo kumushyira ahitaruye, agasuzumwa kandi agategereza iminsi 14 igenwa n’abaganga ngo hamenyekane uko ubuzima bwe bumeze.

Umuyobozi Mukuru wa RBC, Dr. Sabin Nsanzimana asaba abaturage kutishisha bagenzi babo bajyanywe mu kato bakekwaho Covid-19.

Ati: “Ntawe ukwiye guha akato uwakize iyi ndwara n’uvuye mu bigo byakira abantu bakekwaho ko banduye Coronavirus kuko kuyirwara si igisebo kandi uwo ari wese yayandura.”

Kuva Covid-19 yagera mu Rwanda taliki 14 Werurwe, 2020 nta muntu irahitana. RBC ivuga ko abayanduye bose bavurwa, kandi ko boroherwa ndetse hari n’abasubiye mu ngo zabo.

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *