Min. Biruta ngo ntibikiri ngombwa guha agaciro ibihe by’ikirere bisanzwe – UMUSEKE

Min. Biruta ngo ntibikiri ngombwa guha agaciro ibihe by’ikirere bisanzwe

Minisitiri w’Ibidukikije, Dr Vincent Biruta avuga ko imihindagurikire y’ibihe yazanye impinduka mu bihe by’ikirere (Umuhindo, Itumba, Urugaryi n’Iki/Impeshyi) abanyarwanda bari basanzwe bagenderaho, agasaba abaturage by’umwihariko abahinzi kutazongera kubigenderaho ahubwo bagaha agaciro amakuru y’iteganyagihe.

Min. Biruta ngo ntibikiri ngombwa kugendera ku bihe by’ikirere bisanzwe

Min. Biruta ngo ntibikiri ngombwa kugendera ku bihe by’ikirere bisanzwe

Minisitiri Dr Vincent Biruta avuga ko abaturage bagomba guha agaciro iteganyagihe bahabwa n’ikigo kirishinzwe ariko ko bakwiye no kujya babisobanurirwa bihagije kuko hakiri umubare munini w’abaturage batabiha agaciro.

Ati “Abahinzi bagiye bahugurwa ku mihindagurikire y’igihe bakurikirana amakuru y’iteganyagihe  ku buryo bageze aho bazi imbuto bashobora gutera bakurikije iteganyagihe  ndetse akaba yamenya igihe ari buterere umuti ku myaka yifashishije iteganyagihe.”

Agaruka ku mihindagurikire y’ibihe, akavuga ko abantu badakwiye gukomeza kugendera ku bihe (Umuhindo, itumba, urugaryi n’Iki/Impeshyi) bari basanzwe bagenderaho mu bikorwa by’ubuhinzi bwabo.

Ati “Iteganyagihe kandi rigira agaciro muri iki gihe duhanganye n’imihindagurikire y’ibihe ku buryo bitakiri ngobwa ko tugendera ku bihe byari bisanzwe ngo tuvuge ngo igihe iki n’iki imvura iragwa cyangwa ngo izuba rirava ibihe birahinduka kubera imihindagurikire y’ibihe  rero amakuru y’iteganyagihe tugomba kuyaha agaciro kandi tukayakoresha uko bikwiye.”

Gusa ngo amakuru y’iteganyagihe agomba gutangwa mu bisobanuro byoroshye ku buryo umuturage usanzwe ayumva neza.

Ati “N’imvura n’iyo bavuga ngo ni muri milimetero (mm) zingahe ziza kugwa njyewe n’ubivuze twabyumva  tukamenya ko iyo mvura iri buze kugwa ariko nk’umuhinzi akeneye kumenya uko iyo mvura iri buze kuba ingana ibyo bigomba gushyirwa mu magambo yorohera buri wese.”

Rukundorwimana ukora umwuga w’ubuhinzi wo mu murenge wa Rilima avuga ko amakuru bahabwa n’ikigo k’iteganyagihe batayasobanukirwa.

Ati “Hari nk’amagambo bakoresha ugasanga tuyafashe gutyo ntitubashije gusobanukirwa icyo bavuze, ibyo bikavamo ingaruka zo kugwa mu bihombo aho imyaka yangirika kuko tutaba twarasobanukiwe n’ibyo iteganyagihe ryatangaje tugapfa guhinga.”

Ubuyobozi bw’ikigo k’iteganyagihe buvuga ko iki kibazo buri kugikemura kuko iki kigo kimaze guhugura abahinzi ibihumbi 500 bo mu turere 14, kandi ko bazakomeza kubahugura.

Abayobozi beretswe uko amakuru y'iteganyagihe akusanywa

Abayobozi beretswe uko amakuru y’iteganyagihe akusanywa

Josiane UWANYIRIGIRA
UMUSEKE.RW

1 Comment

  1. Mushobozi

    06/12/2017 at 7:31 pm

    Mwatubwira iryo teganyabihe ryanyu ukomuripima nibyuma mufite byo kuripima?

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017