Minisports yahagaritse ibikorwa by’imikino byose kugeza muri Nzeri | UMUSEKE

Minisports yahagaritse ibikorwa by’imikino byose kugeza muri Nzeri

Amarushanwa y’imikino yose cyangwa ibindi bikorwa by’imikino harimo no kwitoza ntibyemewe mu Rwanda kugeza muri Nzeri, 2020. Ni ikemezo cya Minisiteri y’Imikino kigamije kurinda ko icyorezo cya Covid-19 kiyongera mu Banyarwanda.

Minisitiri wa Siporo Aurore Munyangaju Mimosa ( Photo@The New Times)

Ibikorwa byose by’imikino byahagaritswe by’agateganyo mu Rwanda kuva tariki ya 15 Werurwe 2020, umunsi umwe nyuma y’uko hatangajwe umurwayi wa mbere wanduye Coronavirus mu Rwanda.

Ku wa Kabiri w’iki cyumweru FERWAFA yanditse isubiza Impuzamashyirahamwe y’Umupira w’Amaguru muri Africa (CAF) ko itegereje ikemezo cya Guverinoma ku bijyanye niba imikino ya rusange izakomorerwa, bityo imenyssha ko ikemezo cya nyuma ku gukomeza cyangwa gusubika Shampiyona y’umupira w’Amaguru mu Rwanda kizatangazwa tariki 30 Gicurasi, 2020.

Inama yahuje abayobozi b’impuzamashyirahamwe y’imikino yose mu Rwanda na Minisiteri y’imikino yaraye ibaye yemeje ko ibikorwa byose bifite aho bihuriye n’imikino bihagarara kuzageza muri Nzeri, 2020.

Ibi bivuze ko imikino y’Igikombe cy’Amahoro na Shampiyona y’umupira w’Amaguru uyu mwaka (2019-2020), imikino isigaye itazakinwa.

Shampiyona y’Ikiciro cya Mbere mu Rwanda mu mupira w’amaguru yasubitswe APR FC ya mbere n’amanota 57 mu mikino 23 ifitanye umukino na Espoir FC, ku mwanya wa kabiri Rayon Sports ifite amanota 51 mu mikino 24.

Iki kemezo kigomba gukurikirwa no kurangiza impaka ziri mu bakunzi b’umupira bakomeje kwibaza niba APR FC iyoboye urutonde by’agateganyo ikwiye guhabwa igikombe, amakipe ari inyuma na yo agafatirwa ibyemezo bijyanye n’imyanya ariho.

Jean Paul MUGABE
UMUSEKE.RW

Subiza

Your email address will not be published. Required fields are marked *