Muri Werurwe, ibiciro ku masoko muri rusange byazamutseho 7.7% | UMUSEKE
RALC Ntibavuga bavuga

Muri Werurwe, ibiciro ku masoko muri rusange byazamutseho 7.7%

Kuri uyu wa mbere tariki 10 Mata, Ikigo cy’igihugu gishinzwe ibarurishamibare mu Rwanda cyasohoye imibare igaragaza ko muri rusange ukomatanyije uko ibiciro byari byifashe mu mijyi no mu byaro, muri Werurwe 2017 ibiciro byazamutseho 13,0% ugereranyije na Werurwe 2016, gusa ku rw’igihugu hagenderwa ku gipimo cyo mu mujyi ubu kiri kuri 7.7%.

Nk’uko bitangazwa n’Ikigo cy’igihugu gishinzwe ibarurishamibare, igipimo ngenderwaho cyifashishwa mu bukungu bw’u Rwanda kiboneka hifashishijwe gusa ibiciro byakusanyijwe mu mijyi.

Aha mu mijyi, ibiciro mu mijyi byiyongereyeho 7,7% mu kwezi gushize kwa Werurwe 2017 ugereranyije na Werurwe 2016. Ni izamuka rikomeje kuba hejuru kuva uyu mwaka watangira, dore ko no muri Gashyantare 2017 byari byazamutseho 8,1%. Gusa, ugereranyije Werurwe 2017 na Gashyantare 2017, ibiciro byazamutseho 0.6%.

Bimwe mu byatumye ibiciro bizamukaho 7,7% muri Werurwe ngo ni ibiciro by’ibiribwa n’ibinyobwa bidasembuye byazamutseho 16,0%, ibiciro by’amazu, amazi, amashanyarazi, gazi n’ibindi bicanwa byazamutseho 2,5%, n’ibiciro by’ibijyanye n’ubwikorezi byazamutseho 8,9%.

Ibiciro mu bice by’icyaro ho mu kwezi gushize kwa Werurwe 2017 byiyongereyeho 15,7% ugereranyije na Werurwe 2016. Ni mu gihe muri Gashyantare 2017 bwo byari byazamutseho 16,2%. ugereranyije Werurwe 2017 na Gashyantare 2017, usanga ibiciro byarazamutseho 1,5%.

Iri zamuka mu byayo ryatewe ahanini n’ibiciro by’ibiribwa n’ibinyobwa bidasembuye byazamutseho 25,7%, n’ibiciro by’ibijyanye n’uburezi byazamutseho 52,0%.

Muri rusange, ibiciro bikomatanyirijwe hamwe byo mu mijyi no mu byaro, mu kwezi gushize kwa Werurwe 2017 ibiciro mu Rwanda byiyongereyeho 13,0% ugereranyije na Werurwe 2016. Ni mu gihe muri Gashyantare 2017 byari byazamutseho 13,4%. Kandi wagereranya Werurwe 2017 na Gashyantare 2017, ugasanga ibiciro byarazamutseho 1,2%.

Nk’uko Bitangazwa n’Ikigo cy’Igihugu gishinzwe Ibarurishamibare, bimwe mu byatumye ibiciro byiyongeraho 13,0% mu kwezi kwa Werurwe 2017 ngo ni ibiciro by’ibiribwa n’ibinyobwa bidasembuye byazamutseho 23,6%, ibiciro by’ibijyanye n’ubwikorezi byazamutseho 5,8%, n’ibiciro by’ibijyanye n’uburezi byazamutseho 23,6%.

UMUSEKE.RW

3 Comments

  1. Sam

    April 10, 2017 at 9:06 pm

    Ibiciro biriyongera,imisoro nuko…..Imana itabare birakaze

  2. Denis

    April 10, 2017 at 11:31 pm

    Iryo niryo terambere

  3. fernandel

    April 12, 2017 at 1:45 pm

    Ibiciro biriyongero n’ubukungu buriyongera. Byose ni bara bara!!!

Ibitekerezo

Your email address will not be published. Required fields are marked *

Aho dukorera

Kigali - Rwanda
Gasabo - Remera
Sonatube
KG 1 Ave 49

Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Since 2011 - Copyright 2017 UMUSEKE IT Ltd All rights reserved

%d bloggers like this: