Nord-Kivu: Col. Bisamaza n’ingabo ze bavuye muri FARDC basanga M23 – UMUSEKE
RALC Ntibavuga bavuga

Nord-Kivu: Col. Bisamaza n’ingabo ze bavuye muri FARDC basanga M23

Kuwa mbere w’iki cyumweru tariki 12 Kanama 2013, umwe mu basirikare bo ku rwego rwo hejuru w’ingabo za Leta ya Congo “FARDC”, wari uyoboye ingabo mu gace ka Beni, Colonel Richard Bisamaza n’ingabo ze zisaga 60 n’abasirikare bakuru bakoranaga bavuye ku ruhande rwa Leta basanga umutwe wa M23.

Abasirikare b'ingabo za Congo Kinshasa ku karasisi/photo internet

Abasirikare b’ingabo za Congo Kinshasa ku karasisi/photo digitalcongo

Aya makuru yemejwe n’umuyobozi w’agace ka Beni, anavuga ko mu gucika banyuze mu gace ka Samboko kari ku bilometero 90 mu Majyaruguru y’Uburengerazuba bwa Beni bagenda, gusa go mbere yo kugenda babanje gutwara amasasu menshi cyane.

Ku ruhande rw’umutwe wa M23, umuvugizi wawo Col. Kazarama Jean Marie Vienney yemeje aya makuru, avuga ko ari imbaraga bungutse ndetse we akavuga ko Col. Bisamaza n’ingabo ze baje bagera ku ijana.

 

Gusa ngo ibimenyetso byari byagaragaye kare kuko ngo kucyumweru tariki 11 Kanama, Col. Bisamaza yanze kujya i Kinshasa kwitaba abamukuriye bari bamutumyeho.

Ahubwo ngo yahise afata umwanzuro wo gusubira i Eringeti ku bilometero 60 mu Majyaruguru y’Uburasirazuba bwa Beni, ari nako gace yahoze ayoboyemo ingabo za Leta zo mu mutwe wa 807 mbere yo kuzamurwa mu ntera.

Bibaye ubwa kane abasirikare bakuru bacika FARDC mu gihe cy’amezi 18 gusa, nyuma ya ba coloneri Albert Kahasha, Seko Mihigo na Mboneza.

UMUSEKE.RW

%d bloggers like this: