Nyagatare: Minisitiri w’Intebe yasuye imirima y’ibigori yizeza abahinzi kubashakira isoko – UMUSEKE

Nyagatare: Minisitiri w’Intebe yasuye imirima y’ibigori yizeza abahinzi kubashakira isoko

Minisitiri w’Intebe, Edourd Ngirente yasuye akarere ka Nyagatare mu ruzinduko rw’umunsi umwe, atambagira igishanga cy’Umuvumba gihinzemo ibigori, akaba yijeje abaturage kubonera isoko ry’umusaruro wabo.

Abahinzi bahinga mu gishanga cy’Umuvumba ngo bashoye miliyoni 150 baritegura kuzakuramo miliyoni 500 nibabona isoko

Umwe mu baturage waganiriye n’umunyamakuru wa RBA yamutangarije ko abahinga muri icyo gishanga bafite imbogamizi zo kubura isoko hafi, bigatuma abamamyi bababahenda ku myaka yabo cyangwa bakajya kuyigurisha muri Uganda.

Yagize ati “Umwaka ushize nasaruye Toni ebyiri (Kg 2000), kuzibika mu nzu zibikika nabi, nta koperative yatuguriye nta n’umushoramari waje kutugurira, twirwanagaho tukagurisha ahabonetse hose.”

Undi muturage wo muri iyi koperative y’abantu 1000 bishyize hamwe bagahinga ibigore, na we yavuze ko iyo bejeje isoko ritinda kuboneka, n’iribonetse bakabaha amafaranga make atangana n’ayo batanga bahinga.

Ati “Iyo dutangiye guhinga ibigori umukozi aba akorera amafaranga 1000, tukagura ifumbire, tukagura imbuto, kubagara tugomba gushyiramo indi fumbire, ubwo umukozi na none aba ahembwa  amafaranga 1000 cyangwa 1200, twamara kweza amafaranga akaza akerewe, bigatuma abandi bagurisha umusaruro ku ruhande ngo abana bajye ku ishuri.”

Umunyamakuru Rutikanga Paul wari kumwe na Minisitiri w’Intebe, yavuze ko yabasabye ko umusaruro wabo wajya ubafasha kwiteza imbere, abashoramari b’Abanyarwanda bakabafasha kugura imashini zakongera agaciro k’umusaruro w’ibigori beza.

Yabijeje kubashakira isoko kandi hagashyirwaho igiciro cyumvikanyweho kinogeye abaturage.

Igishanga cy’Umuvumba cyatunganyijwe muri 2013, cyatangiye guhingwa mu 2014 mu buryo bugezweho, nibura ngo kuri iyi nshuro abahinzi bashoye miliyoni 150 z’amafaranga y’u Rwanda mu mirimo itandukanye bakoze n’imbuto n’ifumbire bahingishije, bakaba bateganya kuzavanamo miliyoni 500.

Minisitiri w’Intebe yijeje abahinzi kubashakira isoko kandi hakanajyaho igiciro kibanogeye ku musaruro wabo

RBA

UMUSEKE.RW

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017