Perezida Samia Suluhu yahaye urugero abaturage ba Tanzania ngo bikingize Covid-19 | UMUSEKE

Perezida Samia Suluhu yahaye urugero abaturage ba Tanzania ngo bikingize Covid-19

Ukeneye kwamamaza! Gusobanuza! Gutanga amakuru? Hamagara 0788772818

Perezida wa Leta zunze ubumwe ya Tanzania, Mme Samia Suluhu Hassan kuri uyu wa Gatatu tariki ya 28 Nyakanga 2021 yabimburiye abandi baturage guhabwa urukingo rwa Covid-19 rwatangiye gutangwa muri iki gihugu bwa mbere.

Perezida wa Tanzania Samia Suluhu yabimburiye abandi guterwa urukingo rwa Covid-19

Tanzania ni kimwe mu bihugu bike bya Afurika byari byaranze gukingira abaturage cyane ku gihe cya Nyakwigendera John Pombe Magufuli, ariko Perezida Suluhu yahinduye byinshi ku bijyanye na politiki yo kwirinda Covid-19.

Samia Suluhu urukingo rwa Covid-19 yaruherewe ku kibuga cya Mnazi Mmoja i Dar es Salaam, ndetse bitambuka imbonankubone kuri televiziyo y’Igihugu.

Mu bandi bakurikiye Samia Suluhu kwakira urukingo ni Minisitiri w’Intebe Kassim Majaliwa, uw’Ubuzima Dorothy Gwajima, n’abandi bayobozi bakuru mu nzego z’umutekano.

Mbere yo guhabwa urukingo, Perezida Samia yavuze ko inkingo zizewe asaba Abanya-Tanzania kwitabira kwikingiza.

Yongeraho ko hari abagaragaje ko biteguye kwikingiza n’abandi batabikozwa, abizeza ko Tanzania izakora ibishoboka byose ngo inkingo zizanwa zibe zizewe.

Samia Suluhu yagiye ku butegetsi muri Weururwe 2021, nyuma y’urupfu rwa Dr. John Pombe Magufuli.

John Pombe Magufuli yagiye arangwa no kudaha agaciro icyorezo cya Covid-19 aho yari yaranze inkingo zakorewe mu mahanga.

Mu minsi ishize, Tanzania yakiriye doze miliyoni imwe y’inkingo za Johnson & Johnson zivuye mu mugambi wa Covax wo kugeza izi nkingo ku bihugu bikennye. Ubu bwoko bw’inkingo za Johnson & Johnson abarutewe bahabwa doze imwe.

REBA YouTube Channel UMUSEKE TV video nziza nk’iyi. UKORA LIKE SHARE na COMMENT

 

NKURUNZIZA Jean Baptiste
UMUSEKE.RW

Subiza

Your email address will not be published. Required fields are marked *