Prof.Karuranga na bamwe mu mfungwa zapimwe COVID-19 bari mu kato "kwa Kabuga" | | UMUSEKE
  • 14/08/2020 9:25 58

Prof.Karuranga na bamwe mu mfungwa zapimwe COVID-19 bari mu kato “kwa Kabuga”

UPDATE: Urukiko rwanzuye ko Prof. Karuranga Egide urubanza rwe ruzakomeza ku wa 13/08/2020. Abunganira uregwa bavugaga ko gufunga Prof. Karuranga kugeza kiriya gihe, n’ubundi byaba bingana no kumufunga iminsi 30 by’agateganyo kandi ari byo Ubushinjacyaha buzaba bushaka.

Ubushinjacyaha bwo bwari bwabwiye Urukiko ko Prof. Karuranga ari mu bapimwe COVID-19 bashyirwa mu kato kamara iminsi 14, bityo busaba ko urubanza rusubikwa.

 

Inkuru yabanje: Uyu mugabo wari Umuyobozi wungirije wa Kaminuza ya Kibungo (UNIK) yari kuburana kuri uyu wa kane tariki 30 Nyakanga 2020, ntiyagaragaye mu Rukiko ngo aburane ifunga n’ifungurwa by’agateganyo kubera ko ari mu kato.

Abunganira Prof Karuranga Egide basabye Ubushinjacyaha kubwira Urukiko aho umukiliya wabo yashyizwe mu kato

Inteko y’Umucamanza umwe n’umwanditsi w’Urukiko yatangiye kuburanisha urubanza rwe saa yine na mirongo ine (10h40).

Umucamanza yabajije niba Prof. Karuranga Egide yitabiriye iburanisha arabura. Yahise abaza Ubushinjacyaha aho Prof. Karuranga Egide ari.

Abahagarariye Ubushinjacyaha bahise babwira Urukiko Isi yugarijwe n’icyorezo cya Covid-19, ndetse kiri no mu Rwanda, bavuga ko Prof. Karuranga Egide yagiye gupimwa Coronavirus kandi ko upimwe ahita ashyirwa mu kato k’iminsi 14.

Ubushinjacyaha bwahise busaba Urukiko ko Prof. Karuranga Egide yazagaragara mu Rukiko byibura nyuma y’iminsi 14.

Ibi byavuzwe n’Ubushinjacyaha byamaganiwe kure n’abunganira Prof. Karuranga Egide.

Me Kiloha Olivier wunganira Karuranga Egide yahise abwira Umucamanza ko ibyo Ubushinjacyaha buvuze bitahabwa agaciro kuko uwo yunganira yagombaga kuburana ku wa 20/07/2020.

Ati “Muribuka ko urubanza rwasubitswe kuko icyo gihe Urukiko rwavuze ko Prof. Karuranga Egide yapimwe CORONAVIRUS, rwimurirwa ku wa 27/07/2020 nabwo ntirwabaye kubera icyo kibazo, none n’uyu munsi Ubushinjacyaha buzanye imbogamizi z’uko uwo twunganira yashyizwe mu kato.”

Me Olivier Kiloha yavuze ko umukiliya we afunzwe mu buryo bunyuranyije n’amategeko.

Me Murangwa Faustin wunganira Prof. Karuranga Egide yabwiye Umucamanza ko yaba we umwunganira mu mategeko ndetse n’umuryango we batazi aho afungiwe.

Ati “Turagira ngo tubabwire ko twe tutazi aho umukiliya wacu afungiye.”

Umunyamategeko wa gatatu mu bunganira Prof. Karuranga witwa Me Tharcisse Idahemuka yasabye Urukiko rw’Ibanze rwa Gasabo kwiyambura ububasha Prof. Karuranga Egide akaburanira mu Rukiko rw’Ibanze rwa Kicukiko kuko n’ubundi afunguye kuri Police ya Kicukiro.

Yabwiye Urukiko ko muri Systems nta kimenyetso na kimwe kirimo cy’Ubushinjacyaha kirega uwo bunganira.

Me Kiloha Olivier wabanje gufata ijambo mu bunganira Prof Karuranga yabajije Urukiko ati “niba Ubushinjacyaha buri gusaba iminsi 14 ngo buze kuburana, buzaba buje kuburana iki ko iminsi 30 basabaga bazaba bayibonye kuko baregeye urukiko tariki ya 13/07/2020?”

Yavuze ko icyo gihe ubusabe bwa parike buzaba bwataye agaciro ku byerekeye iminsi 30 y’ifungwa ry’agateganyo.

Umucamanza yumvise impande zombi ategeka ko ahagaritse iburamisha avuga ko urukiko ruza gusoma icyemezo cyarwo ku nzitizi zatanzwe n’abunganira Prof. Karuranga Egide saa kumi z’umugoroba uyu munsi.

Ubushinjacyaha burega Prof Karuranga gukoresha nabi umutungo wa Leta ufitiye rubanda akamaro, Gufata icyemezo gishingiye ku itonesha n’Ubucuti, Urwango cyangwa icyenewabo.

Prof Karuranga Egide yatawe muri yombi ku wa 03 Nyakanga 2020.

Amakuru yizewe Umuseke wamenye ni uko Prof. Karuranga Egide yajyanywe mu kato mu kigo cyo kwa Kabuga cyakira inzererezi, akaba ahafunganywe n’izindi mfungwa zo muri kasho zo muri Kigali zapimwe CORONAVIRUS.

Azaburanishwa  13, Kanama, 2020  avuye mu kato, yashyizwemo kubera COVID-19.

Prof Karuranga Egide yari Umuyobozi wungirije ya Kaminuza ya Kibungo iherutse gufungwa burundu na Minisiteri y’Uburezi

NKUNDINEZA Jean Paul
UMUSEKE.RW

4 Ni byo bitekerezo bimaze gutangwa

  • COVID yaragikemuye kabisa. Heheheee!!

  • Uyu Egide harya ntiyahoze akuriye diaspora ya Canada akigisha iyo za Laval? Isi yabaye umudugudu pe!

  • Munzererezi kweli! Iyo nyiturano ko arinziza se? Abarahira nimujye kurahira nababwira iki!

  • @ akumiro

    Ni akumiro nyine kuba wumva ko umuntu wayoboye diaspora ya Canada akanigisha za Laval ntacyo yabazwa!

    Ibihe biha ibindi niba yaratekereje nkawe ni akumiro kuko agomba kubazwa ibyo abazwa, yaba umwere agataha yashaka agasubira Canada…

Subiza

Your email address will not be published. Required fields are marked *