Rwarutabura na Rujugiro basuye Karim Makenzi wemeza ko afana Amavubi – UMUSEKE

Rwarutabura na Rujugiro basuye Karim Makenzi wemeza ko afana Amavubi

Nairobi- Myugariro w’ikipe y’igihugu y’u Burundi Nizigiyimana Karim Makenzi wakiniye amakipe akomeye mu Rwanda ubu arwariye muri Kenya nyuma yo kubagwa. Yasuwe n’abafana b’abanyarwanda; Ngenzahimana Bosco uzwi cyane nka Rwarutabura wa Rayon sports, na Munyaneza Jacques uzwi nka Rujugiro wa APR FC.

Nizigiyimana Karim Makenzi n'umufasha we Usanase Nadjima basuwe n'abafana b'abanyarwanda

Nizigiyimana Karim Makenzi n’umufasha we Usanase Nadjima basuwe n’abafana b’abanyarwanda

Aba bafana bakomeye b’Amavubi bagiye gushyigikira ikipe y’igihugu muri CECAFA.

Umunsi wa mbere wa CECAFA Senior Challenge Cup 2017 urakomeza uyu munsi mu itsinda rya kabiri. Umukino ukomeye kurusha indi urahuza Intamba mu rugamba z’u Burundi n’Imisambi ya Uganda.

Abarundi barakina badafite umwe mu bafite inararibonye,  myugariro Nizigiyimana Karim Makenzi usanzwe ukina muri Gor Mahia FC aha muri Kenya ahabereye iyi mikino ya CECAFA.

Yagize ikibazo cy’imvune cyatumye atarangiza imikino ya shampiyona ya Kenya. Ubu akomeje kwitabwaho n’abaganga kuko yavunitse igufa ryakaguru k’iburyo.

Uyu mugabo w’imyaka 28 yasuwe n’abafana bazwi mu Rwanda Rwarutabura na Rujugiro mu gitondo cy’uyu munsi, bari kumwe n’umunyarwanda wabakiriye muri Kenya, Mukeshimana Joy Happiness.

Karim yabwiye Umuseke ko ababajwe no kudakina CECAFA ariko atewe ishema no kuba azirikanwa n’abanyarwanda.

Ati “Ni ibihe bigoye kuri njye kuko nzongera gukina umupira mu mpeshyi y’umwaka utaha. Abaganga hano bakomeje kunyitaho. Nababajwe no kuba imikino ya CECAFA ibereye muri Kenya aho nsanzwe nkina ariko ntashobora kwigaragaza. Gusa ni byiza ko mbonye inshuti zanjye z’abanyarwanda baza kunsura. Ntewe ishema n’urukundo banyeretse.”

Yakomeje yemeza ko asigaye afana ikipe y’igihugu Amavubi y’u Rwanda kuko afite umugore w’umunyarwandakazi. Bafite ubukwe muri Werurwe 2018.

Ni ibyishimo kuri uyu muryango

Ni ibyishimo kuri uyu muryango

Roben NGABO

UMUSEKE

1 Comment

  1. Celestin

    04/12/2017 at 6:10 pm

    Ababagabo bakozecyane

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017