Sadio Mane yatowe nk’umukinnyi uhabwa Ballon d'Or ya Africa - UMUSEKE
  • 25/02/2020 5:33 31

Sadio Mane yatowe nk’umukinnyi uhabwa Ballon d’Or ya Africa

Rutahizamu w’Umunya-Senegal ukinira Liverpool yo mu Bwongereza, Sadio Mane ni we watowe nk’umukinnyi mwiza w’umwaka wa 2019 muri Africa ahigitse ibihangange birimo na Mohammed Salah bakinana.

Sadio Mane benshi bamubona nk’umukinnyi witwaye neza ku Isi mu mwaka 2019

Sadio Mane w’imyaka 27 yegukanye iki gihembo bwa mbere nyuma yo kuza mu bakinnyi batatu beza ku mugabane wa Africa inshuro eshatu zikurikiranya.

Umukinnyi w’umwaka mu bagore, yabaye Umunya-Nigeria, Asisat Oshoala w’imyaka 26, yegukanye iki gihembo ku nshuro ya kane atsinze Umunya-Cameroun, Ajara Njoya Nchout n’Umunya-Afurika y’Epfo, Thembi Kgatlana.

Umukinnyi ukiri muto w’umwaka yabaye Umunya-Maroc, Achraf Hakimi w’imyaka 22 ukinira Borussia Dortmund mu Budage.

Umukinnyi witwaye neza mu bakina ku Mugabane wa Africa ni Umunya-Misiri, Tarrek Hamed ukinira Zamalek SC.

Ni umuhango wo gutanga ibihembo by’abitwaye neza mu mwaka ushize ku Mugabane wa Africa wabaye kuri uyu wa Kabiri tariki ya 7 Mutarama 2020 i Hurghada mu Misiri.

Wayobowe na Samuel Eto’o Fils wabaye umukinnyi ukomeye mu makipe y’i Burayi no mu kipe y’Igihugu ya Cameroun ndetse akaba yaratowe nk’umukinnyi mwiza muri Africa inshuro enye.

Umutoza w’ikipe y’igihugu ya Algérie, Djamel Belmadi, yatowe nk’uw’umwaka mu bagabo, naho Diseree Ellis wa Africa y’Epfo atorwa nk’uw’umwaka wa 2019 mu bagore.

Perezida wa TP Mazembe yo muri Repubulika Iharanira Demokarasi ya Congo, Moïse Katumbi yashimiwe nka Perezida w’umwaka, naho ishyirahamwe ry’umupira w’amaguru mu Misiri ritorwa nk’iry’umwaka.

Ikipe y’umwaka ku mugabane wa Africa igizwe na:

Umuzamu: Andre Onana (Ajax/Cameroon).

Ba myugariro: Achraf Hakimi (Borussia Dortmund/Morocco), Kalidou Koulibaly (Napoli/Senegal), Joel Matip (Liverpool/Cameroon), Serge Aurier (Tottenham/Ivory Coast).

Abakina hagati: Riyad Mahrez (Manchester City/Algeria), Idrissa Gana Gueye (Paris St-Germain/Senegal), Hakim Ziyech (Ajax/Morocco).

Abataha izamu: Mohamed Salah (Liverpool/Egypt), Sadio Mane (Liverpool/Senegal), Pierre-Emerick Aubameyang (Arsenal/Gabon).

Ni cyo gihembo gikomeye ahawe muri Africa nubwo yatoranyijwe inshuro eshatu zikurikiranya mu bakwiye iki gihembo ariko bagenzi be bakamutsinda

Jean Paul MUGABE
UMUSEKE.RW

2 Ni byo bitekerezo bimaze gutangwa

  • Iyo kipe sinyemey kbx ntabwo ikwiye

  • iyokipe nisawa ntahobibeshye

Subiza

Your email address will not be published. Required fields are marked *