Save: Imiryango 93 yari imaze imyaka 8 mu icumbi kuva yavanwa muri nyakatsi yatujwe – UMUSEKE

Save: Imiryango 93 yari imaze imyaka 8 mu icumbi kuva yavanwa muri nyakatsi yatujwe

Kuri uyu wa gatanu, ubuyobozi bw’Akarere ka Gisagara bwatashye inzu 93 zubakiwe abaturage batishoboye bari bamaze imyaka 8 mu icumbi, kuva bakurwa muri nyakatsi bari batarabona aho kuba.

Inzu zahawe abatishoboye bakuwe muri nyakatsi mu myaka 8 ishize.

Inzu zahawe abatishoboye bakuwe muri nyakatsi mu myaka 8 ishize.

Nyirandikubwimana Floride umwe mu bahawe inzu avuga ko yahoraga aca inshuro yo kwishyura inzu, agahorana ubukene yaterwaga no kutagira aho aba.

Ati ”Ubu nanjye ngiye guhindura imyumvire nkore ndeke gukorera abandi, ngiye gutangira korora kuko aho nacumbikaga sinari nemerewe kororera mu nzu y’abandi, ariko ubu ndumva nanjye nabaye umuntu mu bandi.”

Umuyobozi w’umurenge wa Save, Kimonyo Innocent avuga ko kutagira aho kuba kw’aba baturage ba Save biri mu bintu byari bibahangayikishije cyane.

Akavuga ko byadindizaga iterambere ryabo, ariko ubu ngo ubwo babonye inzu bigeye gutuma iterambere ryabo muri rusange rirushaho kwihuta.

Ati ”Burya kubwira umuturage iby’iterambere atagira aho aba biragora, ariko bamwe ubu bafite inka, bafite ibiraro, ndetse n’abadafite imirima hari imirima idahingwa tuzabaha bahinge, bafumbire kuko ifumbire nayo bamaze kuyibona.”

Abatishoboye bishimiye inzu bahawe.

Abatishoboye bishimiye inzu bahawe.

Umuyobozi w’Akarere ka Gisagara Rutaburingoga Jerome yasabye aba baturage bahawe inzu kurushaho guharanira kwigira, bashaka icyabateza imbere kuko ubu noneho bari iwabo batakiri mu icumbi.

Mayor Rutaburingoga kandi yasabye abaturage kwirinda abababwira ngo ntibishoboka, abashishikariza kujya ahubwo bigira kubafite icyo babarusha.

Ati “Iyo uhorana n’abantu batishoboye cyangwa batagize icyo bakurusha, cyangwa ugahora ureba uukuri inyuma mu iterambere, uhora wumva ngo ntibishoboka, bigatuma udatera imbere ugahora mu maganya. Icyo dusaba abaturage bacu ni ukwegera abafite intambwe babarushaho, kugira ngo babigane banabigisha kugera aho nabo bageze.”

Yongeraho ati ”Iyo uhora muri babandi bafite amaganya ntacyo ugeraho uhora muri ntibishoboka, dusaba abaturage bacu kuva mumaganya bakajya muri birashoboka.”

Mu karere ka Gisagara hamaze kuzura inzu zigera kuri 900 inzu zubakiwe abatishoboye ku bufatanye n’ingabo, akarere ndetse n’imiganda y’abaturage.

Umuyobozi w'Akarere ka Gisagara yasabye abaturage gukora bakiteza imbere.

Umuyobozi w’Akarere ka Gisagara yasabye abaturage gukora bakiteza imbere.

Christine NDACYAYISENGA
UMUSEKE.RW/Gisagara

2 Comments

  1. NZABANDORA Hope

    24/11/2017 at 7:04 pm

    Ko mbona basa nabatuye ahantu hahanamye, bazakora iki kugirango ISURI itonona ariya mazu. Ndabona hariibitateganyijwe

  2. ndizeye

    25/11/2017 at 5:14 am

    aya mazu ko mbona asa ukuntu gusa aruta nyakatsi ikibazo nibaza nuko umuntu usanzwe batamwemerera kwiyubakira nk’iriya NGO ntijyanye n’igishushanyombonera nyamara Leta yo ikabikora bikemerwa

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017