Shampiyona izasubukurwa muri Nzeri 2020-FERWABA - UMUSEKE
  • 07/06/2020 12:10 45

Shampiyona izasubukurwa muri Nzeri 2020-FERWABA

Ishyirahamwe ry’Umukino wa Basketball mu Rwanda (FERWABA) ryemeje ko Shampiyona yayo ya 2019-2020 mu bagabo no mu bagore izasubukurwa muri Nzeri 2020. Byamenyeshejwe mu nama yabaye kuri iki cyumweru tariki ya 17 Gicurasi hifashishijwe ikoranabuhanga (Video conference).

Basket nayo izasubukurwa muri Nzeri, 2020

Umwe mu myanzuro yafatiwe muri iriya nama harimo ko Shampiyona igomba gusubukurwa muri Nzeri uyu mwaka mu gihe amarushanwa yari yateguwe mu kiciro cy’abakuru yakuweho.

Imwe mu myanzuro yafatiwe muri iriya nama :

Abitabiriye inama bose, bemeranyije ko ik’ibanze (Priority) ari ukurangiza shampiyona ya 2019-2020 yose, yaba imikino ibanza ndetse n’iyo kwishyura mu buryo bukurikira:

– Imyitozo izatangira: Muri Kanama 2020
– Imikino ibanza izakinwa hagati ya tariki 04-13 Nzeri 2020
– Imikino yo kwishyura izakinwa hagati ya tariki 18/09/2020 na 18/10/2020
– Play-offs 1/2 zizakinwa tariki 30/10/2020 na 06/11/2020
– Playoffs imikino ya nyuma: Izakinwa 04-18 Ukuboza 2020
– All Stars Game: Izakinwa 26/12/2020.

Hemejwe ko buri kipe izajya ikina imikino ibiri byibura mu Cyumweru,  byaba ngombwa mu buryo budasanzwe hakaba hakitabazwa umukino wa gatatu ariko bikaba ku makipe yose ntayirengagijwe.

Mu rwego rwo kugabanya igihe imikino ya nyuma (Playoffs) yakinwagamo, hemejwe ko imikino ya 1/2 yaba itatu aho kuba itanu,  imikino ya nyuma ikazaba itanu aho kuba irindwi.

Ikipe izagira imbogamizi z’ubushobozi cyangwa izindi zifitanye isano n’ingaruka z’icyorezo cya Covid-19, ishobora kwandika isaba guhagarika kwitabira muri Shampiyona, kandi ntifatirwe ibihano nk’uko bisanzwe biteganywa.

Abanyamuryango bakomorewe imisanzu y’abanyamuryango ya 2019-2020 kubera ibihe bidasanzwe n’ingaruka byagize ku mikoro y’abanyamuryango.

FERWAFA yasabye abanyamuryango gukomeza gukurikiza amabwiriza yatanzwe n’ubuyobozi bw’igihugu mu guhangana n’icyorezo cya Covid-19, kandi ubu hemewe imyitozo y’umuntu ku giti ke ariko amakipe akazatangira kwitoza muri Kanama 2020.

Inteko ya FERWABA yakoze inama binyuze mu ikoranabuhanga

Jean Paul MUGABE
UMUSEKE.RW

Subiza

Your email address will not be published. Required fields are marked *