Théoneste Bagosora wari ufungiye muri Mali yapfuye | UMUSEKE

Théoneste Bagosora wari ufungiye muri Mali yapfuye

Ukeneye kwamamaza! Gusobanuza! Gutanga amakuru? Hamagara 0788772818

Abinyujije ku rukuta rwa Facebook, Achille Bagosora umuhungu wa Colonel Theoneste Bagosora yanditse ubutumwa yifuriza Se iruhuko ridashira, nyuma gereza yo muri Mali yemeze ko Bagorora yapfuye.

Theoneste Bagosora afatwa nk’umucurabwenge wa Jenoside yakorewe Abatutsi 1994

Ku rukuta rwe rwa Facebook, Achille Bagosora yanditse ati “RIP Papa” bisobanuye “Ruhukira mu mahoro Papa.”

Ubutumwa Achille Bagosora yanditse benshi mu nshuti ze n’ababanye na Se banditse ubutumwa bumwifuriza gukomera.

Théoneste Bagosora yari afungiwe mu gihugu cya Mali aho yasorezaga igifungo yakatiwe kubera ibyaha bya Jenoside yakorewe Abatutsi mu 1994.

Yaje guhamwa n’ibyaha bya Jenoside, yari afungiwe muri Gereza yo muri Mali aho ari kurangiza igifungo yakatiwe cy’imyaka 35. Tariki ya 6 Werurwe 2019, yasabye IRMCT ko yarekurwa atararangiza igifungo cye.

Umucamanza Carmel Agius yatangaje umwanzuro we ku busabe bwa Bagosora, amwangira gufungurwa akarangiriza igihano cye hanze nk’uko yari yabisabye.

Colonel Théoneste Bagosora afatwa nk’umwe mu bacurabwenge bakomeye ba Jenoside yakorewe Abatutsi.

Kimwe mu bintu yibukirwaho ni uko tariki ya 9 Mutarama 1993, ubwo Arusha muri Tanzania, hemerezwaga igice cy’amasezerano y’amahoro kirebana no gusaranganya ubutegetsi hagati ya Guverinoma y’u Rwanda na FPR-Inkotanyi n’andi mashyaka, yavuyeyo arakaye cyane.

Bagosora yari mu Ntumwa z’u Rwanda muri iyo nama ya Arusha, ntiyemeye ibyavuyemo. Uyu mugabo yasohotse arakaye aravuga ngo “Ndatashye ngiye gutegura imperuka”, (yakoresheje ijambo ry’Igifaransa, Apocalypse).

Bagosora yatawe muri yombi tariki ya 9 Werurwe 1996 afatiwe muri Cameroon ahita yoherezwa muri ICTR ku wa 23 Mutarama 1997. Ubwo yitabaga urukiko ku nshuro ye ya mbere ku wa 7 Werurwe 1997, yahakanye ibyaha byose yashinjwaga.

Ku wa 18 Ukuboza 2008, ICTR yahamije Bagosora icyaha cya jenoside, ibyaha byibasiye inyokomuntu (ubuhotozi, itsembatsemba, itoteza, gusambanya ku gahato n’ibindi bikorwa birenze kamere muntu). Yahise akatirwa igifungo cya burundu.

Ku wa 14 Ukuboza 2011, yaje kujuririra uwo mwanzuro w’urukiko maze igihano cyo gufungwa burundu gikurwaho akatirwa gufungwa imyaka 35. Mu mwaka wakurikiyeho ku wa 1 Nyakanga 2012, yoherejwe kurangiriza igihano cye muri Mali.

Ku wa 6 Werurwe 2019, yasabye ko yafungurwa mbere y’uko igihano cye kirangira, avuga ko mu gihe ubusabe bwe bwakwemerwa, yifuza koherezwa mu Buholandi cyangwa se akaba yakomeza gutura muri Mali.

Amategeko y’uru rukiko, agena ko umuntu ufunzwe 2/3 by’igihano cye, ashobora gusaba gufungurwa mbere y’igihe. Bagosora ni umwe mu bari bemerewe ibiteganywa n’iryo tegeko kuko icyo gihe yakimaze muri gereza.

Umucamanza ashingiye ku buremere bw’ibyaha Bagosora yahamijwe n’imyitwarire ye muri gereza itaraba myiza nubwo abacungagereza batangaje ko agenda ahinduka, yavuze ko akwiye gukomeza gufungwa ari nako ahindura imyitwarire.

Col Théoneste Bagosora yavukiye mu yahoze ari Komini Giciye muri Perefegitura ya Gisenyi mu 1941, yinjira mu gisirikare arangije amashuri yisumbuye muri Seminari Nto ya Nyundo mu 1962, asohoka ari Sous-Lieutenant mu 1964.

Yakoze mu mitwe myinshi y’ingabo, aza gukora muri Minisiteri y’Ingabo, aba Umuyoboi w’Ikigo cya Gisirikare cya Kanombe na Bataillon LAA (yari ishinzwe ibyo guhanura indege).

REBA YouTube Channel UMUSEKE TV video nziza nk’iyi. UKORA LIKE SHARE na COMMENT

NDEKEZI JOHNSON / UMUSEKE.RW 

4 Ni byo bitekerezo bimaze gutangwa

  • Ngo upfuye aba abaye umutagatifu. Wasanga yarabonye igihe cyo kwihana ibyaha yakoze akiri kuri iyi isi. Ibyo aribyo byose, iyo u RWANDA rutaza kubyara BAGOSORA, ndahamya ko nta génoside yakorewe abatutsi yari kuba muri uru Rwanda. Njya nibaza ngo uwazagira rimwe akazana abajenosideri bakatawe n’urukiko rwa ARUSHA, n’abandi nkabo, maze akabazengurutsa u RWANDA, yarangiza akabasubiza iyo. Apfuye atabonye u RWANDA n’abanyarwanda bo muri 2021, atabonye aho u RWANDA rwongeye kuba u RWANDA; Atabonye iterambere n’ubumwe n’ubwiyunge by’abanyarwanda. Icyakora , agiye azi neza ko ubu u RWANDA ari igihugu cy’AMAHORO; Cyiyubatse muri byose. Ko gifite ingabo zatojwe cyinyamwuga. Zishobora gutabara aho ariho hose, kandi ko nta génoside izongera kuba mu RWAGASABO. Isomo kubasigaye kuri iyi isi: IRINDI IKIBI, KUNDA ABANTU BOSE, CYANE WIRINDE IKINTU CYOSE CYATUMA WAMBURA IKIREMWAMUNTU UBUZIMA , KUKO IMANA IBYANGA URUNUKA.

    • @ Muvunyi,ngo upfuye aba abaye umutagatifu???Byanditse he muli Bible?Mujye mwiga bible,aho kwemera ibinyoma.Upfuye yaranze kwihana,aba agiye mu gitaka,atazongera kubaho.Nkuko Abaroma 6:23 havuga,igihembo cy’abanyabyaha ni URUPFU (rwa burundu).Ariko abantu bumvira Imana,bakayishaka,bakayikorera,ntibibere mu by’isi gusa,izabazura ku munsi wa nyuma,ibahe ubuzima bw’iteka muli paradizo.Soma Yohana 6:40.Ni Yezu wabivuze.Abibera mu gushaka iby’isi gusa ntibashake Imana (kandi abo nibo benshi cyane),nabo iyo bapfuye “barabora” bikarangira ntibazazuke.
      Nabyo bisome muli Abagalatiya 6:8.Roho idapfa kandi itekereza yahimbwe n’umugereki witwaga Socrates.Nta kindi gice cy’umubiri gitekereza uretse Ubwonko.Imana yaduhaye Bible ngo ituyobore.
      Birababaje kubona abantu baba “intiti” mu by’isi,ariko bakanga kwiga bible.Icyo kizarimbuza benshi.

  • Abo yicishije bamubabariye mbere yuko bapfa,aho bagiraga bati”mana umubabarire kuko atazi ibyo akora”
    Nagende imana nayo ishireho akayo ,gusa yasize inkuru mbi imusozi,nabo yabyaye bizabakurikirana

  • Nukubeshya!!buriya se nawe yapfa?

Subiza

Your email address will not be published. Required fields are marked *