Ubushinwa bwikomye abashaka kubukoraho iperereza ku nkomoko ya Covid-19 - UMUSEKE
  • 01/06/2020 1:43 40

Ubushinwa bwikomye abashaka kubukoraho iperereza ku nkomoko ya Covid-19

Ambasaderi w’u Bushinwa muri UN witwa Chen Xu yavuze ko igihugu ke kidashobora kwemerera itsinda mpuzamahanga ry’abahanga mu by’ibyorezo kujyayo gukora iperereza rigamije kumenya inkomoko y’icyorezo cya Coronavirus n’indwara giteza yiswe Covid-19.

Amb. Chen Xu avuga ko igihe n’ikigera uzashaka gukora iperereza mu Bushinwa azoroherezwa ariko ngo ubu si cyo gihe

Perezida wa America arakemeza ko iriya virus yaturutse muri laboratwari iri i Wuhan mu Bushinwa.

Kuva icyorezo cya Covid-19 giterwa na virus yiswe Corona cyatangira kuvugwa mu Bushinwa, ndetse kikibasira cyane u Burayi na Leta zunze ubumwe za America (USA), ubutegetsi bw’i Washington bwatangaje ko iriya virus yakorewe mu Bushinwa.

Mbere hari abandi bahanga batangaje ko iriya virus yaba yarakomotse ku ducurama abantu bariye cyangwa bahuye natwo mu bundi buryo tukabanduza.

Umuryango w’Abibumbye wasabye u Bushinwa ko bwakorana n’itsinda ry’abandi bashakashatsi bakarebera hamwe niba koko iriya virus yaraturutse mu ducurama cyangwa ‘yaraturutse ahandi.’

Ikifuzo cy’uyu muryango nticyahawe ikaze n’abanyapolitiki b’u Bushinwa barimo n’ubuhagarariye muri UN witwa Chen Xu, uyu akaba avuga ko ibyo kureba inkomoko ya Covid-19 byazakorwa nyuma ari uko icyorezo kimaze gucika mu bantu.

Mu kiganiro yahaye Abanyamakuru binyuze mu ikoranabuhanga Amb. Chen yagize ati: “Ik’ingenzi kurusha ibindi muri iki gihe ni ukubanza guhagarika ikwirakwira ry’iki cyorezo, tukagitsinda burundu, ibindi bikazaza nyuma.”

Avuga ko u Bushinwa budatewe ikibazo n’iryo perereza kandi ko bwiteguye kuzafatanya n’abantu bose bazashaka gukorera iperereza ku butaka bwabwo igihe nikigera.

Umunyamabanga wa Leta muri USA ushinzwe ububanyi n’Amahanga, Mike Pompeo aherutse kuvuga ko igihugu ke gifite amakuru yizewe yerekana ko inkomoko ya Covid-19 yashakirwa muri laboratwari iri mu mujyi wa Wuhan.

Icyorezo cya Covid-19 kugeza ubu kishe abantu barenga 250 000 ku Isi gituma ubukungu bugwa.

France 24

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *