Ubutwari nibuhere mu muryango, ababyeyi bigishe abana gukunda igihugu – Min Nyirasafari               

Ku munsi w’Intwari z’Igihugu, Minisitiri w’Umuco na Siporo yasabye urubyiruko kugendera mu kirenge nk’icyaranze Intwari. Nyirasafari Esperance yavuze ko ubutwari buhera mu muryango, ababyeyi batoza abana kugira umuco wo gukunda igihugu, kwitangira abandi no gukunda umurimo.

Minisitiri w’Umuco na Siporo Esperance Nyirasafari avuga ko ubutwari bukwiye gutangirira mu muryango

Mu muhango wo gushyira indabo ku Gicumbi cy’Intwari kuko muri rusange Umunsi w’Intwari wizihijwe ku rwego rw’umudugudu, Minisitiri Nyirasafari Esperance wari kumwe na Perezida wa Sena, Bernard Makuza, Perezida w’Urukiko rw’Ikirenga Sam Rugege, Minisitiri w’Intebe, Dr Ngirente Edouard, n’Umugaba Mukuru w’Ingabo z’u Rwanda, Gen Patrick Nyamvumba, yavuze ko umuco w’ubutwari ukwiye gutozwa abato.

Yagize ati “Ubutwari buhera mu muryango babyumve, ariko noneho n’urubyiruko rwacu aho ruri hose yaba mu mashuri, mu biganiro byinshi bakurikira bumve ko intwari nyinshi twibuka zari urubyiruko babigeraho kuko bari bato.”

Yavuze ko urubyiruko rusabwa kuva mu bibarangaza bidafite akamaro bakagira intego yo kubaka igihugu na bo bakiyubaka ubwabo.

Ministiri Nyirasafari akomeza avuga ko ubutwari bwagakwiye gushingira ku myitwarire n’imigenzereze yaranze intwari birimo gukunda igihugu, ubumwe n’ubupfura.

Ati “Icyo dusaba Abanyarwanda ni uko ibyaranze Intwari twabyigiraho tukabigira imibereho yacu ya buri munsi, mu byo dukora no mu byo dutekereza, tukubakira kuri izo ndangagaciro zaranze Intwari.”

Kuri Twitter Perezida Paul Kagame uri i Arusha muri Tanzania, mu nama ya 20 y’Abakuru b’Ibihugu bya EAC yasingije intwari avuga ko ubwitange bwazo butabaye imfabusa, ndetse asaba Abanyarwanda gukora ngo igihugu kigere aho bifuza kuba abari.

Umunsi wo kwibuka Intwari z’Igihugu uraba ku nshuro ya 25,  ufite insanganyamatsiko igira iti “Dukomeze ubutwari mu kerekezo twahisemo”.

Ministiri Nyirasafari Esperance yavuze ko ikerekezo igihugu cyahisemo gishingiye ku bumwe, kureba kure, kumenya gusobanura ibyo ukora n’ibyo ukorera Abanyarwanda.

Ati “Icyo kererkezo hamwe n’ibindi bijyana n’imibereho myiza, turasaba Abanyarwanda kugikomeraho bakarinda ibyo tumaze kugeraho. Duharanire twese kureba imbere, kwitangira igihugu no kwanga akarengane.”

Dr Pierre Damien Habumuremyi Umuyobozi w’Urwego rushinzwe Intwari z’Igihugu, Impeta n’Imidari avuga ko Intwari zibaho kandi zizahoraho, akongeraho ko Intwari zemejwe n’Igihugu atari zo zonyine ahubwo ko hazatoranywa n’abandi.

Perezida wa Sena Bernard Makuza yunamira Intwari z’Igihugu

Intwari Fred Gisa Rwigema ari mu Kiciro k’Imanzi, hari n’ikiciro k’Imena n’ikindi k’Ingenzi

Abo mu miryango y’Intwari baje kuzunamira

Abayobozi Bakuru b’Igihugu bitabiriye umuhango wo gushyira indabo ku Gicumbi cy’Intwari i Remera

Josiane UWANYIRIGIRA
UMUSEKE.RW