Umukobwa yari abonye umusore bakundana, asanga umuryango we wishe uw'iwabo | UMUSEKE
RALC Ntibavuga bavuga

Umukobwa yari abonye umusore bakundana, asanga umuryango we wishe uw’iwabo

Muraho abasomyi b’urubuga Umuseke.rw!

Reka mbanze mbashimire, mutugezaho amakuru akoranye ubuhanga ndetse mukanaduha urubuga rwogutangiraho ibitekerezo ntawe muheje. Mu Rwanda hari imbuga nyinshi zandiko amakuru ariko mwebwe mbakundira ko muri abanyamwuga.

Ntatinze rero nifuje kubagezaho ikibazo nahuye nacyo ngo mugisangize n’abasomyi bangire inama kuko nkekako atari icyanjye njye nyine ahubwo hari benshi wenda duhuje bitewe n’amateka twanyuzemo nk’abanyarwanda.

Ndi umukobwa mfite imyaka 25 nkaba ndimo kurangiza icyiciro icyiciro cya mbere cya kaminuza (undergraduate) niga hanze y’u Rwanda mazeyo imyaka 3.

Muri genocide narimfite imyaka 3 ni nabwo nabuze ababyeyi banjye bakaba barishwe n’interahamwe bajyana na benshi bo mu muryango mugari  iwacu. Sinagize amahirwe yo kumenya ababyeyi banjye navutse ndi umwe kwa papa na Mama ariko papa yari yarabyaye undi mwana ku wundi mugore ubu nawe ariho. Nanagize amahirwe yo gusigarana mukuru wa Mama ubu ni umubikira nawe.

Nyuma ya genocide nabaye mu kigo cy’imfubyi nyuma umugore wa kabiri wa Papa niwe waje kunkurayo turabana arandera mu bushobozi bwe buke yarafite ndiga ndangiza high school ndetse mbona na scholarship niyo yangejeje aha ngeze. Nakuze nibaza icyo ababyeyi banjye bazize ariko uko nkura niko nagiye menya ukuri ko bazize ko bari Abatutsi ubwo nanjye menya gutyo ko ndiwe.

Guhera icyo gihe ntahise numva nanze Abahutu ndetse numva bose ari abicanyi ubwo abandi numvaga bavuga ngo kubabarira njyewe ntago umutima wanjye wigeze ubyakira nibaza impamvu abantu bakora ubugome bungana gutyo nkumva ko butapfa kubashiramo any time nanjye bashobora kunyica.

Sinamenye aho ababyeyi banjye baguye sinanenye n’ababishe, abantu bambwira ko bahunze interahamwe bava aho twari dutuye ku Mumena ngo bashaka guca i Kibungo ngo banjye muri Tanzania ariko ngo interahamwe zabirutseho bakwira imishwaro zigenda zibicira ahantu hatandukanye.

Nihuse rero, aha niga nta banyafrika benshi bahaba abahari turakundana cyane usanga dufashanya muri byose ariko ni njye munyarwanda njyenyine waruhari nkumva bimpaye amahoro kuko ntawe nishishaga ko ari umuhutu ngo numve umutima udatuje.

Nkitangira umwaka wa 2 haje umusore w’umunyarwanda aje kwiga Masters, njya ku mwakira mufasha njyana n’abandi bagenzi banjye nkuko twafashaga kwakira abandi banyafrica baje kwiga hano mwereka aho duharira, ahari urusengero, ndetse nuko batega bajya cg bava ku ishuri n’ahandi hose. Ariko sinigeze mubaza ibintu byinshi kuko nabonaga nawe acecetse cyane.

Uko iminsi yagiye ishira niko uyu muhungu yagiye anyereka urukundo cyane ndetse we akanyereka ko uko namwakiriye akihagera aribyo byatumye ankunda. Mbigendamo buke nubwo nabonaga ari mwiza rwose ari umuhungu w’igihagararo nkumva nanjye namwerera nkongera nkigarura kuko ntari nakamumenya amateka ye nihagararaho.

Iminsi uko yicuma niko yakomeje kunyiyegeraza ariko akaba umuntu uvuga make cyane avuga kuri bene wabo inshuro nke zishoboka nanjye nkagira ubwoba byo kubimubaza. Ntiyigeze arekera aho kuntereta ashyizemo imbaraga kuburyo mbona ko ari serious. Mpitamo gushakisha amateka ye.

U Rwanda rero ni ruto ku buryo nuwashaka kumenya icyo warariye yarara akimenye, nahise menya aho avuka nsanga bari batuye hafi yo kwa sogokuru ubyara mama mbajije mukuru wa mama nsanga arabazi neza ndetse ambwirako na se afunze ari mubishe umuryango wo kwa sogokuru nyina we ngo yazize indwara.

Kuva nkibimenya nahise mbura amahoro mbura aho nkwirwa ntangira ku mutinya kugera n’uyu munsi iyo mubonye numva ntangiye gutitira kandi we ahora ashaka ko duhura buri munsi. Ishuri ryacu ni rinini cyane ariko ntibimubuza kugenda urugendo rwa 30 min n’amaguru ava kuri graduate school aza kuri undergraduate school. Nabuze uko mbigenza mbibwira abashinzwe counseling hano bansaba ko baduhuza tukabiganira ariko nabuze icyo mbasubiza kuko sinabibasha.

Sinabona amagambo mbimubwiramo kuko sinamubwira ngo ntitwakundana kuko ari umuhutu! Nabuze aho mucikira ku buryo amanota yanjye yagabanutse ndaranshikagurika ndota aje kunyica. Bagenzi banjye narabibabwiye iyo aje rimwe na rimwe bamuhisha ko mpari akagenda ariko ntava kwizima ahora agaruka.

Rero bavandimwe basomyi b’umuseke mu ngire inama nkore iki ngo nkomeze nige amasomo yanjye neza ko numva nabuze umutekano? Muri iyi minsi y’icyunamo noneho nari naramugoreweho yahoraga anshaka. Bagenzi banjye bangiriye inama yo ku murega muri police kuko hano hari amategeko akomeye ubwo yahamwa n’icyaha cya harassment agacibwa $2,500 ndetse agafungwa amezi 6.

Nubwo nta mwemereye urukundo ariko simwifuriza gufungwa ngo atakaze amasomo ye. Simvangura amoko ntawe nanga ariko rwose umutima wanjye ntiwanyemerera gukundana n’umusore iwabo bakoze genocide by’umwihariko bishe umuryango wacu. Ese iyi nayo ni ingengabitekerezo ya jenoside? mungire inama.

Sorry for many typo mistake nagerageje kwandika mu Kinyarwanda gusa nihagira amakosa mubonamo munyihanganire. Ntimushyireho amazina yanjye.

Murakoze cyane.

Aho dukorera

Kigali - Rwanda
Gasabo - Remera
Sonatube
KG 1 Ave 49

Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Since 2011 - Copyright 2017 UMUSEKE IT Ltd All rights reserved

%d bloggers like this: