Umunsi wa nyuma wa Champiyona y'u Bwongereza, Man U yatunguranye, Man City ica agahigo | | UMUSEKE
  • 05/08/2020 1:04 46

Umunsi wa nyuma wa Champiyona y’u Bwongereza, Man U yatunguranye, Man City ica agahigo

Shampiyona y’ikiciro cya mbere mu Bwongereza, Premier League, Manchester United yitwara neza ibona itiki yo gukina UEFA champions League mu mwaka utaha w’imikino nyuma yo gutsinda Liecester City 2-0, ikarangiza iri ku mwanya gatatu.

Manchester United yarangije Shampiyona iri inyuma ya Manchester City zihorazihanganye

Kuri iki Cyumweru tariki ya 26 Nyakanga nibwo imikino y’umunsi wanyuma muri shampiyona y’u Bwongereza yakinwaga , imikino yose yatangiye ku isaha ya saa Kuminimwe (17H00’).

Umukino wari utegerejwe na benshi ni uwahuje Leicester City na Manchester United, zatandukanywaga n’inota rimwe ndetse zihataniye kurangiza mu makipe ane ya mbere akina imikino y’amakipe y’abaye ayambere iwayo ku mugabane w’u Burayi (UEFA Champions League).

Manchester United yasabwa kungana ngo ibone inota rimwe irangize shampiyona iri ku mwannya wa kane, cyangwa igatsinda uriya mukino kugira ngo isoze shampiyona iri ku mwanya wa kane.
Leicester yasabwa gutsinda Manchester United kugira ngo irangize shampiyona ari iya kane ibone itiki yo kuzakina imikino ya UEFA Champions League.

Igice cya mbere cyarangiye nta kinipe n’imwe ibashije gutsinda indi ari 0-0, gusa Leicester City yari yitwaye neza igerageza uburyo bwavamo igitego ariko ba myugariro ba Manchester United bakitwara neza.

Mu gice cya kabiri Manchester United ku munota wa 71’ yabonye igitego cya mbere cyatsinzwe na Bruno Fernandes kuri penaliti nyuma y’ikosa ryakorewe Anthony Martial.

Leicester yakomeje kwitwara neza ishaka kwishyura ariko bikanga, ku munota wa 90’ Jonny Evans wa Leicester yahawe ikarita y’umutuku nyuma y’ikosa yakoreye Scott McTominay.

Manchester United yakoze impinduka Mason Greenwood asimburwa na Jesse Lingard waje kubonera iyi kipe yiyita Amashitani Atukuru igitego cya kabiri mu minota y’inyongera, umukino urangira Manchester United itsinze Leicester 2-0.

Nyuma y’uko Manchester United itsinze uyu mukino yahise ibona itiki yo kuzakina UEFA Champions League nyuma yo kurangiza shampiyona iri ku mwanya wa gatatu.

Chelsea FC yabaye iya kane nyuma yo gutsinda Wolves ibitego 2-0 naho Manchester City yarangije ari iya kabiri itsinda Norwich City 5-0, ica agahigo ko gutsinda ibitego birenze 100 muri shampiyona yikurikiranya.

Rutahizamu wa Leicester City, Jamie Vardy, ni we wasoje ayoboye abatsinze ibitego byinshi na 23 mu gihe Pierre-Emerick Aubameyang wa Arsenal na Danny Ings wa Southampton, bombi batsinze 22.

Ikipe eshatu zamanutse mu kiciro cya kabiri ku munota wa nyuma, AFC Bournemouth, Watford na Norwich City mu gihe kugeza ubu ebyiri zimaze kumenyekana zizasimbura ziriya ari Leeds United na West Bromwich Albion ikipe ya gatatu izamenyekana nyuma y’imikino ya kamarampaka (Play-off), izahuza ikipe 4: Cardiff City, Fulham, Brentford na Swansea City izarusha izindi ni yo izazamuka.

Uko imikino y’umunsi wa nyuma ya Shampiyona yagenze:

Arsenal 3-2 Watford
Burnley 1-2 Brighton & Hove Albion
Chelsea 2-0 Wolverhampton Wanderers
Crystal Palace 1-1 Tottenham Hotspur
Everton 1-3 AFC Bournemouth
Leicester City 0-2 Manchester United
Manchester City 5-0 Norwich City
Newcastle United 1-3 Liverpool
Southampton 3-1 Sheffield United
West Ham United 1-1 Aston Villa

Jean Paul MUGABE
UMUSEKE.RW

Subiza

Your email address will not be published. Required fields are marked *