Umusore umurika imideli muri Congo agiye gukorana na Golden Model

Ku nshuro ya mbere ikompanyi ikora ubujyanama bw’abamurikamideri izwi nka ‘Golden Model’ yamaze guha amasezerano y’imyaka ibiri umu-model wo muri Congo Kinhsasa witwa Piscas Zambithe. Aya masezerano akubiyemo ibijyanye no gushakira akazi ko kumurika imideri uyu musore.

Mu byo Golden model yemereye Piscas harimo no kumushakira akazi ko kumurika imideri

Kabano Franco uhagarariye iyi kompanyi yavuze ko  bitari byoroshye kwemeranya n’uyu musore ariko kuko ngo ari umuhanga mu kumurika imideri byaje gukunda, ubu bakaba bagiye gukorana imyaka ibiri.

Franco ati “Twasinyishije uyu musore mu buryo bwemewe n’amategeko, tuzamufasha kubona ibitaramo amurikamo imideri, tuzamwigisha byinshi mu bijyanye no kumurika imideri.”

Uyu musore asinyishijwe muri iyi kompanyi nyuma yo kumara hafi amezi atanu mu igeragezwa

Franco akomeza agira ati “Mu by’ukuri njye namenyanye n’uyu musore mu mpera za 2017, icyo gihe nari nagiye i Goma mu gitaramo cya Volcano Top model nyuma yo kubona uko yitwaye twakomeje tuvugana kugera ubwo nasubiye i Goma mu kindi gitaramo cya soiré Liputa fashion show cyabaye kuwa 8 Werurwe 2018 kuva ubwo duhita twemeranya ko tugiye gukorana.”

Mu byo iyi Kompanyi izafasha uyu musore harimo kumushakira akazi ko kumurika imideri mu bitaramo bitandukanye cyane ibyo muri Congo no muri Africa y’Iburasirazuba (East Africa), bazamuha amahugurwa mpuzamahanga mu byo kumurika imideri ndetse bazamufasha mu bijyanye no gutunganya amafoto.

Usibye Piscas Zambithe ngo Golden Model yiteguye gusinyisha abandi bamurikamideri mu minsi ya vuba.

Piscas afite imyaka 19 n’uburebure bwa 1m80cm amaze kumurika imideri mu gitaramo kimwe cya Soiré Liputa Fashion Show cyabaye muri Werurwe uyu mwaka.

Piscas Zambithe yasinye imyaka ibiri muri Golden Model

Robert KAYIHURA
UMUSEKE.RW