Uyobora St. Joseph-Kabgayi ati “umushahara wa mwarimu si mwinshi, si na muke”

• Kugira ngo mwarimu abeho neza ngo agomba kubigiramo uruhare,
• Ati “Umurezi ni uba hafi y’abanyeshuri.”

Frère Innocent Akimana uyobora urwunge rw’amashuri Saint Joseph Kabgayi mu karere ka Muhanga avuga ko imibereho mibi y’abarimu iri mu bidindiza ireme ry’uburezi ariko ko kugira ngo bayisohokemo bagomba kubigiramo uruhare kuko umushahara bahembwa atari mwinshi ariko atari na muke ku buryo wabafasha gutangiza umushinga uciriritse wabazamura.

Frere Akimana avuga ko umushahara w’abarimu udahagije ariko na none utari muke

Muri ibi byumeru bibiri mu Rwanda hose hari kuba ubukanguramaba bugamije gushyira hanze no gushaka umuti w’ibibazo bibangamiye kugera ku ireme ry’uburezi ryuzuye.

Frère Akimana Innocent avuga ko ibituma ireme ry’uburezi ritagerwaho ari byinshi ariko ko we abona icya mbere ari imibereho y’abarimu itarahabwa agaciro gakwiye.

Agaragaza icyakemura ibibazi byugarije ireme ry’uburezi, ati «Mwarimu agahabwa agaciro we yumva akeneye muri sosiyete, ntabwo 100% byashoboka ariko nibura akumva ko afite ako gaciro. Bamuhe ingufu, abone imibereho  myiza mu kazi akora.»

Uyu murezi uvuga ko nta kindi yigeze akora mu buzima bwe atari uburezi, avuga ko ibi byose bizagirwamo uruhare na mwarimu.

Ati «…Nari mvuze ngo bamuhe nk’aho hari abandi bazabimuha na we azabigiremo uruhare, umushahara ahembwa si muke kandi si na mwinshi, ntunagomba kuba na mwinshi kuko umwinshi ntubaho. »

Avuga ko gukora neza akazi k’uburezi bisaba kugakunda no kukiyumvamo ariko ko abajya mu burezi muri iki gihe babikora ari amaburakindi.

Ati «Ikibyica byose ni uko umuntu ajya mu burezi atabikunda cyangwa atabishaka, naho iyo ubikunda unabishaka n’ayo mafaranga ntabwo biyasaba ntunabivuga cyangwa ngo ubibone ko ari cyo kibazo kuko ubundi buzima bufite amafaranga ni bwinshi cyane hanze aha…

Iyo uhisemo kujya kuba umurezi, ntabwo ugiyeyo uyobewe ko harimo amafaranga make cyangwa ataguhagije kuko make yo ntabaho ariko uzi neza ko atari ayo wifuza, niba wagiyeyo ni uko ari umwuga wumva ushaka kandi ukunda.»

Umuyobozi w’ishami rya Kaminuza y’u Rwanda ry’ubukungu n’icungamari, Dr Gasheja Faustin uyobora itsinda riri mu bukangurambaga ku ireme ry’uburezi mu karere ka Muhanga, yagiranye ikiganiro n’abarimu bo muri G.S Saint Joseph-Kabgayi abashimira akazi bakora kuko gasaba ubwitange.

Dr Gasheja Faustin yagarutse ku mpaka zijya zibaho z’abantu bafite agaciro hagati y’abantu bakora imirimo ikomeye nko gutwara indege n’abakora umurimo w’uburezi.

Ati «Bose birangira bibutse ko banyuze imbere ya mwarimu. »

Uyu muyobozi muri Kaminuza y’u Rwanda avuga ko nta muntu ukwiye kwinjira mu burezi agamije inyungu z’amikoro ahambaye ahubwo ko agomba gushyira imbere inyungu z’igihugu.

Agaragaza ingaruka zaterwa no kuba umwarimu yakwigisha nabi abanyeshuri kubera kutishimira umushahara, yagize ati “Uramuroga uyu munsi, mu gihe kiri imbere azakuroga akuvura nabi igihe uzaba ukuze.”

Umurezi ni uba hafi y’abanyeshuri…

G.S Saint Joseph-Kabgayi ni ikigo cyamenyekanye kuva mu bihe byatambutse ko abahanyuze baba bafite ubumenyi buhagije.

Frère Akimana umaze imyaka ine ayobora iri shuri avuga ko aya mateka atera umwite abaje kuhiga kuko baba bumva ko bagomba kugendera mu murongo w’ababanjirije,

Gusa ngo ibi bigomba utizwa umurindi n’umuhate w’ubuyobozi bw’ishuri kuko kugira ngo abanyeshuri be bumve ibyo abasaba byose aba yabanye na bo bakarushaho kumwumvira.

Ati «Ntushobora kwitwa umurezi ngo ushobore ibintu by’uburezi utabana n’abana, kuba hafi y’abana, ukaba hafi y’abarezi n’ibindi byose birikora. Iyo uri hafi y’abana baragukunda, iyo bagukunze icyo ubabwiye cyose baragikora n’icyo ubifuzaho cyose kirakunda […] umurezi ni uba hafi y’abana. »

Iri shuri ryasuwe muri ubu bukangurambaga bumaze icyumweru, ryashimiwe kuba rifite ibikoresho bifasha abanyeshuri gukurikirana neza amasomo no kwimenyerezo imikoro, gusa risabwa kugira ibyo rinoza birimo isuku.

Ubu bukangurambaga ku ireme ry’uburezi burakomeje…Insanganyamatsiko igira iti “Imyigire myiza n’indangagaciro, ni ishingiro ry’uburezi bufite ireme.”

Abayobozi bari muri ubu bukangurambaga batambagiye ikigo cyase bakagenda basaba ubuyobozi bwacyo kunoza aho babona bitagenda

Twabasuye mu gihe cyo gufata ifunguro

Muri Saint Joseph batojwe kwiyogereza amasahani, Dr Gasheja wo muri UR yarabishimye cyane

Aho bigira mudasobwa babasabye kuzashaka ikibaho kitandikishwaho ingwa kuko ivumbi ryazo ryangiza machine

Basuye n’aho bakorera ubushakashatsi

Dr Gasheja yagiye kureba n’aho abana basomera ibitabo

Dr Gasheja yasabye abarezi bo muri iki kigo kumva ko abo bigisha ari nk’imfura zabo

Martin NIYONKURU
UMUSEKE.RW