Uyu munsi mu 1994, Umwamikazi Rosalia Gicanda nibwo yishwe arashwe – UMUSEKE
RALC Ntibavuga bavuga

Uyu munsi mu 1994, Umwamikazi Rosalia Gicanda nibwo yishwe arashwe

Mu 2012 urukiko rwa Arusha rwahamije Capt Ildephonse Nizeyimana ibyaha bya Jenoside birimo gutanga amabwiriza yo kwica Umwamikazi Rosalia Gicanda wari utuye mu mujyi wa Butare. Gicanda yari umuntu wubashywe kandi ukundwa na benshi, urupfu rwe ku itariki 20 Mata 1994 rwabaye nk’intango y’ubwicanyi bukabije ku batutsi i Butare muri Jenoside yabakorerwaga n’ahandi mu Rwanda.

Rosalia Gicanda mbere gato ya 1959 ari kumwe n'umugabo we Umwami Mutara III Rudahigwa

Rosalia Gicanda mbere gato ya 1959 ari kumwe n’umugabo we Umwami Mutara III Rudahigwa

Gicanda yari umupfakazi kuva muri Nyakanga 1959 ubwo umugabo we, Umwami Mutara III Rudahigwa yatanze (gupfa k’umwami) i Bujumbura, abari kumwe nawe icyo gihe bahamya ko nawe yishwe n’Ababiligi bavugaga ko bagiye kumuvura.

Rosalia Gicanda kuva icyo gihe we yafashe umwanzuro wo kuguma mu Rwanda nubwo abo mu muryango we benshi na muramu we (Umwami Kigeli V Ndahindurwa) yari amaze nawe guhunga mu 1960, Leta ya Kayibanda na Habyarimana ziyemeje kumurinda kuko ahanini nta nyungu ya Politiki zabonaga mu kumugirira nabi nubwo bwose zari Leta zimakaza amacakubiri.

Gicanda yibereye i Butare kuva icyo gihe, agahora mu bikorwa byo gufasha abakene, yabaye inshuti na benshi kandi yagiriye neza abakene benshi atavanguye amoko nk’uko byagiye bitangazwa mu buhamya bunyuranye bw’abamwibuka mu bihe byashize. Abakene benshi bacaga ku rugo rwe rwari imbere y’ibiro by’icyari Komine Ngoma kunywa amata no guhabwa ifunguro.

Abanyeshuri babishaka bigaga muri Kaminuza icyo gihe baramusuraga, ndetse hari na bishwa be na bene wabo mu myaka ya 1970 na 80 bavaga mu buhungiro Tanzania na Uganda bagashyira ubuzima bwabo mu kaga bakaza kumusura.

Jenoside yagiye gutangira ari umukecuru, abana n’abandi bakecuru benshi b’inshuti hamwe na nyina, nta muntu watekerezaga ko yakwica Umwamikazi wagiriye neza benshi, n’Interahamwe z’i Butare ngo zaramwubahaga, kuko uwo atagiriye neza yagiriye neza mwene wabo cyangwa yari yarumvise uwo yagiriye neza.

Ariko tariki 20 Mata 1994 abasirikare bayobowe na Lt. Pierre Bizimana boherejwe na Capt Ildephonse Nizeyimana wavukaga muri Komini Karago akaba n’umuyobozi mu ishuri rya gisirikare ESO i Butare, binjiye iwe bamujyanana n’abandi babyeyi batandatu mu ikamyoneti, babarasira inyuma y’ingoro ndangamurage y’u Rwanda mu ishyamba rihari n’ubu, Gicanda yari amaze kugira imyaka 80.

Uyu munsi yishweho ubwicanyi bwahise butangira muri Kaminuza y’u Rwanda, hicwa abanyeshuri, abarimu n’abashakashatsi b’Abatutsi.

Iminsi ibiri nyuma, nyina babanaga nawe baraje baramwica. Umwana umwe w’umukobwa wahabaga niwe warokotse ubu bwicanyi, aba ari we wo kuvuga ibyabaye.

Urupfu rwe rwahise rukwirakwira hose muri Butare, runatiza Interahamwe umurindi  wo kwirara mu batutsi b’i Butare benshi batangira kwicwa.

Umwamikazi wa nyuma w’u Rwanda, Rosalia Gicanda abakuru bamuzi bibuka ubugiraneza bwe, ubuntu n’impuhwe ku bababaye byamuranze. Izina rye rikaba rizakomeza kwibukwa no kuri iyi tariki yiciweho.

Kuri uyu wa gatatu i Nyanza ku rugo rw’Umwami Mutara III Rudahigwa habereye umuhango wo kwibuka Gicanda, uyu muhango ukaba witabiriwe na Mme Jeannette Kagame.

Mu muhango wo kwibuka Rosalia Gicanda i Nyanza kuri uyu wa gatatu

Mu muhango wo kwibuka Rosalia Gicanda i Nyanza kuri uyu wa gatatu

Rosalia Gicanda

Rosalia Gicanda

UMUSEKE.RW

%d bloggers like this: