Uyu mwaka abatorotse gereza ni 25 ariko 17 barafashwe – RCS – UMUSEKE

Uyu mwaka abatorotse gereza ni 25 ariko 17 barafashwe – RCS

*Mu Rwanda abagororwa bose ni 64 757…Ababacunga ni 1 694,
*RCS ngo ntifunga gusa…

Ubuyobozi bw’Urwego rw’Igihugu rushinzwe imfungwa n’abagororwa (RCS) buratangaza ko abagororwa bamaze gutoroka gereza baba bafungiyemo kuva muri Mutarama uyu mwaka ari 25, ariko muri bo 17 bafashwe mu gihe abandi barimo na Ntamuhanga Cassien na bagenzi be babiri baheruka gutoroka bagishakishwa.

Umuyobozi wa RCS Brig Gen Rwigamba avuga ko Ntamuhanga na bagenzi be batorokanye bagishakishwa

Umuyobozi wa RCS Brig Gen Rwigamba avuga ko Ntamuhanga na bagenzi be batorokanye bagishakishwa. Photo/M.Niyonkuru/Umuseke

Gereza zo mu Rwanda zicumbikiye imfungwa n’abagororwa 64 757 barimo 28 806 bafungiye icyaha cya Jenoside.

Komiseri mukuru wa RCS, Brig Gen Rwigamba George avuga ko umubare w’abacungagereza ukiri hasi kuko ari 1 694, ni ukuvuga umucungagereza umwe arinda abagororwa 39.

RCS ivuga ko kuva muri Mutarama 2017, abagororwa 25 ari bo bamaze gutoroka ariko ko 17 bamaze kugaruzwa barimo abafatiwe hanze y’igihugu bakaba barahise basubizwa gukora ibihano byabo.

Mu mpera z’Ukwakira, uru rwego rwasohoye itangazo rimenyesha ko abagororwa batatu barimo uwahoze ari Umunyamakuru Ntamuhanga Cassien waregwaga mu rubanza rumwe na Kizito Mihigo, batorotse gereza ya Nyanza (Mpanga).

Brig Gen Rwigamba avuga ko benshi muri aba bagororwa, batoroka bajyanywe hanze nko kuvuzwa cyangwa kuburana uretse uyu Ntamuhanga na bagenzi be batorotse bakoresheje imigozi basimbuka urukuta rwa gereza bari bafungiyemo.

Uyu muyobozi wa RCS avuga ko iri toroka ridafitanye isano n’umubare muto w’abacungagereza.

Ati «Ntabwo biterwa n’ubuke bwacu, bigendanye n’amayeri umuntu aba yakoresheje, bijya bibaho. »

Ntamuhanga Cassien wari wahamijwe ibyaha byo kugambanira igihugu, kugirira nabi ubutegetsi buriho no kurema umutwe w’abagizi ba nabi agakatirwa gufungwa imyaka 30 we na babiri bacikanye kugeza ubu batarafatwa.

SIP Alexis Murenzi ushinzwe ibikorwa bya RCS, avuga ko uru rwego ruticaye kuko ruri gukoresha imbaraga zose zishoboka kugira ngo abatoroka bafatwe.

Ati «Uko bagerageza gutoroka natwe dufatanyije n’izindi nzego ni ko dushyiramo ingufu kugira ngo abo bantu bagarurwe. »

 

RCS ngo ntifunga gusa iranagorora

Gereza zo mu Rwanda zikunze gutungwa agatoki ko zibanda mu gufasha imfungwa n’abagororwa kurangiza igihano aho kugorora nk’uko biri mu nshingano zazo.

Brig Rwigamba George avuga ko ibi atari byo kuko buri mugororwa wese ugeze muri gereza ashobora gukurikirana amasomo yifuza by’umwihariko abatazi gusoma no kwandika bahita biyandikisha bakabyigishwa.

Ati «Ibikorwa biri muri gereza birimo inyigisho nyinshi, ku magereza menshi ubu turubaka, iyo bahageze bajya mu bikorwa by’ubwubatsi, bakiga gusudira, kubaza,…»

Avuga kandi ko gahunda za leta zose zinagera muri gereza. Ati «Iz’ubumwe n’ubwiyunge [za Ndi Umunyarwanda, iz’iyobokamana n’iz’isanamitima] ibyo byose iyo bageze muri gereza barabyigishwa. »

Imfungwa n’abagororwa biyandikishije mu gukurikirana amasomo y’ubumenyingiro, abiga ni 99,6%, abiga gusoma no kwandika ni 91%.

Imfungwa n’abagororwa bo muri Gereza y’abana i Nyagatare bose hamwe ni 374, abiga mu mashuri abanza ni 279, abiga ayisumbuye ni 20.

Muri aba banyeshuri, abakoze ibizamini bya Leta bisoza amashuri abanza ni 16 abakoze igisoza ikiciro rusange cy’amashuri yisumbuye ni batanu.

Martin NIYONKURU
UMUSEKE.RW

1 Comment

  1. Runyoni

    06/12/2017 at 8:28 pm

    Harya cya kibazo cy’abantu bafunze batagira dosiye Fazili yigeze gupfa na Busingye cyaracyemutse?

Ibitekerezo

Your email address will not be published. Required fields are marked *




Amakuru

info@umuseke.rw
Phone: +250 788516551
Phone: +250 788772818

Kwamamaza

sales@umuseke.rw
+25 0788772818
+25 0785383188

Aho dukorera

Kigali - Rwanda
Gasabo - Remera
Sonatube
KG 1 Ave 49

Umuseke since 2011 - Copyright 2017