Mu mukino w’umunsi wa 26 wa shampiyona, ikipe ya Rayon Sports FC na Gicumbi FC yirwanagaho, zagabanye amanota ku bitego 2-2.
Ni umukino watangiye Saa Sita n’igice z’amanywa, uyoborwa na Gakuru Steven uzwi nka Soupple wari umusifuzi wo hagati mu kibuga.
Rayon Sports yaje gukina uyu mukino yaruhukije abakinnyi basanzwe babanzamo, barimo Kwizera Olivier, Moussa Esenu, Iranzi Jean Claude, Nizigiyimana Karim Mackenzie, Niyigena Clèment, Nishimwe Blaise na Muhire Kevin [wabanje ku ntebe y’abasimbura].
Uyu mukino witabiriwe n’abafana babarikaga, wari umukino udashamaje, cyane ko ikipe zombi zari zifite intego zitandukanye muri uyu mukino.
Ikipe ya Gicumbi FC yaje muri uyu mukino igomba kwirwanaho, cyane ko imibare yagaragazaga ko mu gihe yari kuwutsinda byari kuyizamurira icyizere cyo kuguma mu Cyiciro cya Mbere mu gihe yari kuzatsinda izindi zose isigaranye.
Hakiri kare cyane mu gice cya Mbere, Léandres Willy Onana yatsindiye Rayon Sports igitego kuri penaliti yari ikorewe Mitima Isaac ku munota wa 27. Ntabwo Gicumbi FC yatinze kwishyura iki gitego kuko ku munota wa 31, Maranda Destin yari abonye inshundura za Rayon nyuma yo guhagarara nabi kwa Hakizimana Adolphe.
Rayon Sports ntabwo yoroheye Gicumbi FC biciye kuri Léandres Willy Onana, wari wagoye cyane iyi kipe, byanaje kuvamo kuyitsinda ikindi gitego ku munota wa 41, maze igice cya Mbere kirangira iyi kipe ikunzwe na benshi mu Rwanda, iyoboye n’ibitego 2-1.
Igice cya Kabiri cyatangiranye n’impinduka ku ruhande rwa Rayon Sports, yahise ikuramo Léandres Willy Onana asimburwa na Manace Mutatu wari uje gufasha ubusatirizi bw’iyi kipe.
Ntabwo byasabye Gicumbi FC iminota myinshi, kuko ku munota wa 51 w’umukino, Maranda Destin yahise yongera kubonera igitego cya Kabiri ikipe ye.
- Advertisement -
Rayon Sports yongeye gukora impinduka, ikuramo Mitima na Kwizera Pierrot, basimburwa na Muhire Kevin na Mico Justin, mu gihe umunyezamu Bonheur yasimbuye mugenzi we Hakizimana Adolphe wagize imvune.
Buri kipe yakomeje gucunga izamu ryayo, bituma imbaraga zari mu mukino zigenda zigabanyuka kuko nta yashakaga kongera ngenzi yayo.
Rayon Sports yongeye gukora impinduka ikuramo Dindjeke wari uvunitse, asimburwa na Bukuru Christophe utaherukaga gukina kubera imvune yari amaranye igihe.
Nyuma yo gukomeza gucungana ku mpande zombi, umukino warangiye ziguye miswi ku bitego 2-2, bituma Gicumbi FC iguma ku mwanya wa nyuma n’amanota 17, mu gihe Rayon nayo yagumanye umwanya wa Gatatu n’amanota 43.
Uko indi mikino yagenze:
Espoir FC 2-3 APR FC
Mukura VS 2-2 AS Kigali FC
Etincelles FC 1-0 Musanze FC
Gorilla FC 0-0 Rutsiro FC
HABIMANA SADI/UMUSEKE.RW