Nyuma yo kongera gushimangira ko ari ikipe ikwiye icyubahiro muri ruhago y’Isi, ikipe ya Real Madrid imibare igaragaza ko yari ikwiye kugera ku mukino wa nyuma ndetse ko ifite rutahizamu n’umutoza bombi beza ku Isi, Karim Benzema na Carlo Ancelotti.
Ku wa Gatatu tariki 4 Gicurasi, nibwo hakinwe umukino wundi wa ½ cy’imikino ihuza amakipe yabaye aya Mbere iwayo ku mugabane w’i Burayi, Uefa Champions League.
Uyu mukino wasize ikipe ya Real Madrid ibifashijwemo na Rodyrgo na Karim Benzema, isezereye Manchester City ku bitego 3-1. Igiteranyo cy’imikino ibiri, cyabaye ibitego 6-5.
Real Madrid yahise isanga Liverpool ku mukino wa nyuma uzabera i Paris mu Bufaransa.
Imwe mu mibare y’ingenzi uyu mukino wasize:
6- Pep Guardiola yujuje inshuro ya Gatandatu asezerererwa muri ½ muri Uefa Champions League [2009-10 na 2011-12 ari muri Barcelona], [2013-14, 2014-15 na 2015-16 ari muri Bayern Munich] na 2021-2022 muri Manchester City.
7- Karim Benzema yatsinze ibitego birindwi muri Champions League igihe yahuye n’amakipe yo mu Bwongereza uyu mwaka.
5 – Carlo Ancelotti yujuje inshuro ya Gatanu agera ku mukino wa nyuma wa Uefa Champions Champions League. Harimo inshuro eshatu yahageranye na AC Milan [2003, 2005 na 2007], hakaba ebyiri yahageranye na Real Madrid [2014 na 2022]. Niwe mutoza uciye aka gahigo.
3- Kuva mu 2003-2004, Real Madrid yabaye ikipe ya Mbere yatsinzwe umukino ubanza wa 1/8 [0-1 PSG] ariko ikabasha kuyisezerera, muri ¼ igasezerera Chelsea (2-3 vs Chelsea), none ikaba yanasezereye Manchester City muri ½ muri Uefa Champions League.
- Advertisement -
10 – Karim Benzema yatsinze ibitego icumi mu mikino ya Uefa Champions League yo gukuranamo muri uyu mwaka w’imikino. Undi mukinnyi waherukaga kubikora ni Cristiano Ronaldo in 2016-17 ubwo yakinaga na Real Madrid.
90 – Rodrygo yabaye umukinnyi wa Mbere wabashije gutsinda ku munota wa 90 mu mukino wo gukuranamo wa Uefa Champions League.
24 – Riyad Mahrez yuzuzaga igitego cye cya 24 mu marushanwa yose yakiniye Manchester City uyu mwaka w’imikino wa 2021-22. Uretse Mohamed Salah umuri imbere n’ibitego 30 mu Bwongereza nta wundi mukinnyi umurusha ibitego byinshi.
36 – Phil Foden ku myaka 21 gusa, yuzuzaga umukino we wa 36 muri Uefa Champions League. Abandi bakoze ako gahigo ku myaka nk’iye ni Cesc Fàbregas (42) na Kylian Mbappé (40).
HABIMANA SADI/UMUSEKE.RW