Ikipe ihagarariye u Rwanda mu irushanwa ry’igikombe cya Afurika mu mukino wa Volleyball [2022 CAVB Men’s African Volleyball Club Championship], Gisagara Volleyball Club yasezereye Club Olympique de Kelibia yo muri Tunisia, ihita igera muri ½ cy’iri rushanwa.
Ni umukino wabaye mu mugoroba wo kuri uyu wa Gatandatu, ikipe ihagarariye u Rwanda, Gisagara VC yageze muri ¼ itsinze imikino yose yabanje uko ari itatu.
Iyari igezweho ni Club Olympique de Kelibia yo muri Tunisia yatsinzwe na Gisagara VC amaseti atatu kuri ebyiri [3-2], bituma iyi kipe ihagarariye u Rwanda muri Tunisia, ibona itike yo muri ½ cy’iri rushanwa.
Muri ½ biteganyijwe ko ku Cyumweru tariki 15 uku kwezi, ari bwo Gisagara VC izakina na Ésperance de Tunisi ibitse iki gikombe. Izi zombi zizakina Saa Kumi n’Ebyiri z’umugoroba zo mu Rwanda.
HABIMANA SADI/UMUSEKE.RW