Volleyball: Mwakoze Gisagara guhesha ishema urwababyaye- Minisitiri Munyangaju

Minisitiri wa Siporo, Hon. Munyangaju Aurore Mimosa yashimiye ikipe y’Akarere ka Gisagara y’umukino wa Volleyball, (Gisagara VC), kuba yaritwaye neza mu mikino y’igikombe cya Afurika y’amakipe yabaye aya mbere iwayo mu bagabo “Men’s African Volleyball Clubs Championship 2022” ikora amateka yegukana umwanya wa Gatatu.

Ikipe ya Gisagara VC yaserukiye u Rwanda mu mikino y’Afurika yahise ikora amateka iba ikipe ya mbere mu Rwanda ibashije kwegukana umwanya nk’uyu ku rwego rw’Afurika, itsinze ikipe ya Port de Douala yo muri Cameroun amaseti 3-1 (18-25, 25-23, 25-18 na 25-18).

Minisitiri Hon. Munyangaju abinyujije ku rubuga rwe rwa Twitter, yagize ati “Mwakoze Gisagara VC guhesha ishema urwababyaye! Amateka yanditswe kuva none kwegukana, umwanya wa 3 mu irushanwa ry’Afurika ‘The 2022 CAVB Men’s African Volleyball Club Championship’, Mukomerezeho.”

UKO GISAGARA VC YITWAYE MURI IRI RUSHANWA

Imikino ya Afurika y’uyu mwaka wa 2022, yatangiye tariki 8, isozwa tariki 16 Gicurasi 2022, yitabiriwe  n’amakipe 14. Gisagara VC yari iherereye mu itsinda rya Kane [D], iri kumwe na Nigeria Customs (Nigeria), Port de Douala (Cameroun) na Equity Bank (Kenya).

Mu mikino y’itsinda, Gisagara VC yitwaye neza itsinda imikino yose uko ari itatu. Yatangiye itsinda Port de Douala amaseti 3-1. Yatsinze ikipe ya Equity Bank amaseti 3-1, inatsinda Nigeria Customs amaseti 3-2.

Mu mikino ya 1/4, ikipe ya Gisagara VC yatsinze CO Kelibia yo muri Tunisia bigoranye amaseti 3-2.  Muri ½, Gisagara VC yatsinzwe na Ésperance Sportive de Tunis yo muri Tunisia amaseti 3-0.

Mu mukino wo guhatanira umwanya wa 3, ikipe ya Gisagara VC yatsinze Port de Douala yo muri Cameroun bari no mu itsinda rimwe (D), amaseti 3-1.

Iyi kipe yari ihagarariye Abanyarwanda bose muri Tunisia, yitabiraga iyi mikino ya Afurika ku nshuro ya Kabiri, nyuma yo kubikora mu 2019 yabereye mu Misiri. Ku nshuro ya Mbere yasoreje ku mwanya wa Cumi mu makipe 22 yitabiriye.

AL AHLY  YEGUKANYE IGIKOMBE KU NSHURO YAYO YA 15

Al Ahly yo mu Misiri yegukanye igikombe cya Afurika, itsinze ikipe ya Ésperance de Tunis amaseti 3-1  ku mukino wa nyuma.

Iyi Al Ahly yashyizeho agahigo ko gutwara iki gikombe inshuro nyinshi (15), CS Sfaxien (Tunisia) irayikurikira aho imaze kugitwara inshuro 6, mukeba  Zamalek VC (Misiri) na Ésperance de Tunis (Tunisia) zigifite inshuro 5.

UKO AMAKIPE YAKURIKIRANYE

1. Al Ahly
2. Esperance de Tunis
3. Gisagara VC
4. Port Douala
5. Kenya Ports Authority
6. Club Olympique de Kelibia
7. Nigeria Customs
8. FAP
9. AS Douanes
10. Equity Bank of Kenya
11. Madda Walabu University
12. AS INJS
13. VC Espoir
14. Wolaitta Dicha

NKOMEJE GUILLAUME/UMUSEKE.RW