Uretse kuba isanzwe ikina amarushanwa ategurwa n’Ishyirahamwe Nyarwanda ry’imikino y’abakozi, ARPST, ikipe ya Rwandair FC igiye guhagararira u Rwanda muri Nigeria.
Ni irushanwa ryateguwe na Shell Football Club yo mu gihugu cya Nigeria. Iri rushanwa rizakinwa n’amakipe ane, atatu yo muri iki gihugu na Rwandair FC izaba iturutse mu Rwanda.
Nk’uko bigaragara mu butumire bwohererejwe Rwandair, iri rushanwa ryiswe “All Star Football Tournament”, rizakinwa mu mpera z’uku kwezi kwa Kamena.
Ni irushanwa ikigo nka Rwandair kizungukiramo byinshi, birimo umubano mwiza n’iki gihugu, kumenyekanisha igihugu biciye muri iyi mikino n’ibindi.
Karuhanga Geoffrey ushinzwe byose bya Siporo muri Rwandair, yabwiye UMUSEKE ko uretse gukina, ikigo cya Rwandair kinungukira mu bufatanye nk’ubu.
Ati “Nk’ubushize baza inaha haje abantu 50. Abarenga icumi baje mu myanya y’icyubahiro [Business Class] kandi biyishyuriye itike y’indege. Ibyo rero ni inyungu kuba abantu barenga 50 baje na Rwandair abenshi bari muri Business Class kandi biyishyuriye amafaranga menshi. Icyo ni ikintu gikomeye cyane twungukamo nk’ikigo cy’Ubwikorezi.”
Karuhanga yakomeje avuga ko uko batsura umubano n’ibindi bihugu, ari ko u Rwanda rurushaho kumenyekana mu bindi byiza rufite.
Uyu muyobozi yanavuze ko gukina irushanwa nk’iri, bituma hanabaho ubusabane hagati y’amakipe aba yaryitabiriye, bityo bigakuza umubano mwiza.
Mu myaka mike Sosiyete ya Rwandair itangije amakipe mu marushanwa ategurwa na ARPST, imaze kwegukana ibikombe bigera kuri bine mu mikino yose [Football, Basketball na Volleyball].
- Advertisement -
UMUSEKE.RW