Mu irushanwa ry’amagare ryari rigamije gushaka impano, Ntakirutimana Joseph yahize bagenzi be aza imbere, ahembwa igare.
Kuri uyu wa Kane i Musanze habaye isiganwa ryateguuwe na Koperative y’abatwara abantu n’ibintu ku magare. Iri siganwa ryabaye ku bufatanye bw’Akarere ka Musanze n’Ishyirahamwe Nyarwanda ry’Umukino wo gusiganwa ku magare [Ferwacy].
Isiganwa ryiswe “Visit Musanze” ryitabiriwe n’abagabo 41 n’abari n’abategarugori 2 aho bazengurutse mu Mujyi wa Musanze ku ntera ingana n’ibilometero 35.
Bamwe mu bayobozi bari baryitabiriye, harimo Murenzi Abdadllah uyobora Ferwafa, Umuyobozi w’Akarere ka Musanze, Ramuli Janvier n’izindi nzego zishinzwe umutekano muri aka Karere.
Nyuma yo gukora intera yari yagenwe, Ntakirutimana Joseph yaje imbere ya bagenzi be ndetse ahembwa igare rishya rizamufasha gukomeza gukora akazi ke neza.
Nyuma y’iri siganwa, ubuyobozi bwa Ferwacy bwagiye gusura ikipe y’Igihugu iri mu mwiherero mu kigo gisanzwe gifasha abari mu myitozo y’i Musanze.
Abari mu mwiherero ni abatarengeje imyaka 23 bari gutegura amarushanwa atandukanye ari imbere harimo na Tour du Faso iteganyijwe kuzakinwa tariki 11 Ugushyingo. Bari gutegurirwa kuzakina Tour du Rwanda 2023, shampiyona ya Afurika 2023 na shampiyona y’Isi izabera mu Rwanda mu 2025.
UMUSEKE.RW