Ubuyobozi bw’ikipe ya REG Women Basketball Club, bubicishije ku mbuga nkoranyambaga z’ikipe, bwerekanye abakinnyi bane iyi kipe iherutse gukura muri The Hoops Women Basketball Club.
Mu minsi ishize ikipe ya REG WBBC yatakaje Kantore Sandra uzwi ku izina rya Dumi, nyuma yo gusubira muri APR WBBC yamuzamuriye izina.
Nyuma yo kumutakaza, REG na yo yahise yerekeza muri The Hoops WBBC ikuramo abakinnyi bane ngenderwaho muri iyi kipe izwiho kuzamura impano z’abakiri bato.
Iyi kipe y’Ikigo cy’Igihugu gishinzwe ingufu REG Women Basketball Club, mu gushaka kongera imbaraga mu kipe, yasinyishije Micomyiza Rosine, Rutagengwa Nadine, Mwizerwa Faustine na Ramura Munezero mu rwego rwo gukomeza gukarishya iyi kipe ifite igikombe cya shampiyona giheruka.
Kuri uyu wa mbere aba bakinnyi bose ni bwo batangajwe banahabwa na nimero bazambara muri uyu mwaka w’imikino.
UMUSEKE.RW