Nyuma yo gutandukana na Bugesera FC, Umutoza w’Umunyarwanda unafite Ubwenegihugu bw’u Burundi, Ndayirangije Étienne ari mu muryango winjira mu ikipe y’Igihugu y’u Burundi y’umupira w’amaguru [Intamba mu Rugamba].
Mu masaha make ashize, ni bwo ikipe ya Bugesera FC ibicishije ku mbuga nkoranyambaga za yo, yatangaje ko yatandukanye na Ndayiragije Étienne biciye mu bwumvikane bw’impande zombi.
Amakuru aturuka mu gihugu cy’u Burundi, avuga ko Ndayiragije ashobora guhabwa ikipe y’igihugu, Intamba mu Rugamba, asimbuye mugenzi we, Ndayizeye Jimmy usanzwe atoza Le Messager Ngozi.
N’ubwo kugeza ubu bitaratangazwa n’Ishyirahamwe ry’umupira w’amaguru muri iki gihugu, amakuru ahaturuka avuga ko uyu mutoza yamaze kwemezwa igisigaye ari ukubitangaza gusa.
Mu gihe havugwa ibi byose ariko, uyu mutoza we arahakana aya makuru nk’uko yabyemereye UMUSEKE, ndetse avuga ko ari amakuru y’ibihuha.
Abari hafi y’uyu mutoza bahamya ko yifuzwa n’ikipe irenze imwe, ndetse byanashoboka yanasubira mu gihugu cya Tanzania yahoze atoza.
Ati “Ni ibihuha.”
Ndayiragije yasize Bugesera FC ku mwanya wa 12 n’amanota 18.
UMUSEKE.RW