Mu gihe habura umukino umwe ngo shampiyona y’icyiciro cya Mbere muri Volleyball isozwe, ikipe ya APR Women Volleyball Club yegukanye igikombe mu cyiciro cy’abagore, mu gihe mu bagabo ho REG VC na Gisagara VC rukigeretse.
Ni nyuma y’imikino yabaye ku Cyumweru tariki ya 8 Mutarama 2022, ubwo hasozwaga imikino y’agace ka Karindwi yari yakiniwe muri IPRC-Ngoma mu minsi ibiri.
Ikipe ya APR WVC yitwaye neza guhera mu mwaka ushize, yongeye kubishimangira ubwo yatsindaga Forefront WVC amaseti 3-1 ku mukino wa nyuma wanatumye ihita yegukana igikombe cya shampiyona n’ubwo habura imikino y’agace ka nyuma.
Seti ya mbere yatsinzwe na Forefront WVC ku manota 25 kuri 21, ariko irigaranzurwa mu zindi seti iratsindwa (25-22, 25-14 na 25-13).
Iyi kipe y’Ingabo yari imaze iminsi yizeye kwegukana igikombe kuko yabigezeho ubwo yatwaraga agace ka Gatandatu kakiniwe mu Ruhango mu mpera z’umwaka ushize. Gusa, yaburaga kwitabira kamwe mu duce tubiri twari dusigaye.
Mu Bagabo, REG VC yakosoye amakosa yakoreye mu Ruhango, isatira Igikombe cya Shampiyona nyuma yo gutsinda mukeba, Gisagara VC, amaseti 3-2 (25-20, 23-25, 25-17, 17-25, 15-12) ku mukino wa nyuma.
Kuri ubu, REG VC iyoboye urutonde rusange n’amanota 49, ikurikiwe na Gisagara VC ifite amanota 48 ku mwanya wa kabiri.
Ikipe ya Sosiyete y’Igihugu ishinzwe Ingufu isabwa byibuze kugera ku mukino wa nyuma mu gace ka nyuma, ka munani, gashobora kuzakinirwa i Kigali ku matariki ataratangazwa.
Kunganya amanota kw’aya makipe abiri ya mbere mu bagabo, bizaha amahirwe REG VC yitwaye neza mu duce twinshi twakinwe.
- Advertisement -
UMUSEKE.RW