Umuyobozi w’abakunzi b’ikipe ya Kiyovu Sports ku rwego rw’Igihugu, Minani Hemedi, yasabye abiyita abakunzi b’iyi kipe guhaguruka bakaba hafi y’abakinnyi kuko ibikombe byombi bishoboka.
Ikipe ya Kiyovu Sports ikomeje kwitwara neza uko iminsi yicuma. Ndetse iyi kipe yo ku Mumena, ni yo iyoboye urutonde rwa shampiyona igeze ku munsi wa 26.
Ni muri urwo rwego, abakunzi b’Urucaca basabwe kwikora ku mufuka kugira ngo bunganire ubuyobozi ku bikenewe byose ngo bakomeze gushaka ibikombe bibiri bakiri gukinira birimo igikombe cya shampiyona n’icy’Amahoro.
Abicishije mu butumwa yageneye abakunzi ba Kiyovu Sports aho bari hose ku Isi, Minani Hemedi, yabasabye guhaguruka bakava mu magambo ahubwo bagashyira mu bikorwa.
Mu butumwa bwe burebure, Minani yibukije abiyita ko ikipe bayirazwe na ba sekuru ko amagambo adahagije, ahubwo gukanda akanyenyeri ari byo bisobanuye urwo rukundo.
Ati “Mu izina ry’uhagarariye abakunzi ba Kiyovu ku Isi, ndashaka kumenyesha abo bireba bose ko uruhare rwa Komite, Staff n’abakinnyi rwo gushaka ibikombe bikinirwa mu Rwanda, bararutweretse.”
“Ndetse batwara igikombe cya made in Rwanda. Icyo buri mukunzi wa Kiyovu Sports ubu asabwa si amagambo, si ibitekerezo gusa, si ubusesenguzi, si ukwikoma abasifuzi cyangwa amakipe yandi. Turasabwa cash. Koresha 18281444400# cyangwa inkunga yawe uyicishe muri Fanclub ubarizwamo.”
“Uwiyita ko Kiyovu Sports yayirazwe n’ababyeyi, ntacyo yayimariye muri ibi bihe, ntazutungurwe no kuba Kiyovu izamwita Yuda. Ndasaba buri wese kwigomwa kugira ngo Kiyovu yongere guhagararira Abanyarwanda hanze y’u Rwanda.”
Minani yasoje avuga ko ikipe abakunzi ba Kiyovu Sports bafite, nta kindi gihe bazongera kuyibona badatwaye igikombe.
- Advertisement -
Iyi kipe yo ku Mumena iyoboye urutonde rwa shampiyona n’amanota 56, mu gihe APR FC iyikirikira ifite amanota 53. Zombi zisigaje imikino ine ngo shampiyona ishyirweho akadomo.
Urucaca kandi rwageze muri 1/2 cy’Igikombe cy’Amahoro, aho ruzahura n’iyi kipe y’Ingabo z’Igihugu.
Kiyovu Sports isigaje imikino irimo: Mukura VS (mu rugo), Musanze FC (hanze), Sunrise FC (hanze) na Rutsiro FC (hanze).
UMUSEKE.RW