Ikipe y’umupira w’amaguru yq Rayon Sports Women Football Club, yakatishije itike yo gukina mu Cyiciro cya Mbere mu mwaka w’imikino 2023/2024.
Iyi kipe yashinzwe umwaka ushize mu 2022, yabigezeho nyuma yo kunyagira Nasho WFC ibitego 10-1 mu mukino wabereye ku kibuga cyo mu Nzove ku wa Gatandatu tariki 29 Mata 2023.
Ni umukino wari witabiriwe n’abakunzi ba Rayon Sports ya basaza ba bo ndetse n’abandi basanzwe bikundira aba bari n’abategarugori.
Abatsindiye iyi kipe, ni Florance Imanizabayo na Rosine Uwiringiyimana bahimba Mbappé bombi batsinze ibitego bitatu, mu gihe Dorothée Mukeshimana n’umunya Kenya, Otieno Judith bo batsinze ibitego bibiri buri umwe.
N’ubwo iyi kipe yabonye itike yo kuzamuka mu Cyiciro cya Mbere, igomba gutegereza iyo bizakina ku mukino usoza shampiyona y’Icyiciro cya Kabiri muri shampiyona y’abagore.
Iyi kipe izakina n’Indahangarwa WFC tariki 30 Mata 2023 ahazwi nka Rwinkwavu, nyuma yo gutsinda APR WFC ibitego 2-0.
Rayon Sports WFC itozwa na Nonde Muhammed uzwi mu makipe atandukanye nka AS Muhanga, irimo abakinnyi basanzwe bafite amazina manini nka Kalimba Alice, Mukeshimana Dorothée, Imanizabayo Florence n’abandi.
UMUSEKE.RW