Umuyobozi w’ikipe ya Gorilla FC, Hadji Mudaheranwa Yussuf wigeze kuba mu buyobozi bw’Ishyirahamwe Nyarwanda ry’Umupira w’Amaguru, Ferwafa, yongeye gutorerwa kuba mu bazayobora Inzibacyuho muri iri shyirahamwe.
Ni mu Nteko Rusange Idasanzwe y’Abanyamuryango ba Ferwafa, yabereye muri Hotel Lemigo, yari igamije gushyiraho abayobora Inzibacyuho y’iminsi 39 muri iri shyirahamwe.
Biciye mu byifuzo by’Abanyamuryango bitabiriye iyi Nteko Rusange Idasanzwe, hashyizweho abayobozi batatu barimo Habyarimana Marcel usanzwe ari Visi Perezida, Mukankaka Ancille uyobora Inyemera WFC na Hadji Mudaheranwa Yussuf uyobora Gorilla FC.
Nyuma yo gutangwaho umukandida muri batatu bo kuyobora Inzibacyuho, Hadji Mudaheranwa yafashe ijambo avuga ko n’ubwo yari yaravuze ko atifuza kuzagaruka mu buyobozi bwa Ferwafa yabayemo imyaka umunani ariko atakwitandukanya n’abandi.
Bisobanuye ko uyu muyobozi yemeye gufatanya na bagenzi be kugeza tariki 24 Kamena 2023 ubwo hazakorwa amatora ya Komite Nyobozi izayobora imyaka ibiri itarasojwe na Komite Nyobozi yeguye.
UMUSEKE.RW