Ishyirahamwe Nyarwanda ry’Umupira w’Amaguru, Ferwafa, ryamenyesheje Abanyamuryango ba ryo bireba, ko umukino uzahuza Gasogi United na Police FC ku wa Gatandatu tariki 20 Gicurasi 2023 utazabera kuri Stade ya Bugesera nk’uko byari biteganyijwe.
Mu mpera z’iki Cyumweru, hateganyijwe imikino y’umunsi wa 29 ya shampiyona y’icyiciro cya Mbere y’umupira w’amaguru. Muri iyi mikino hari ifite igisobanuro kinini mu ziri kurwanira igikombe cya shampiyona n’iziri kurwana no kutazamanuka mu Cyiciro cya Kabiri.
Biciye mu ibaruwa yandikiwe ubuyobozi bwa Gasogi United, yanditswe n’Umuyobozi Mukuru Ushinzwe ibikorwa mu Mujyi wa Kigali, iyi kipe yamenyeshejwe ko ubusabe bwa yo bwa tariki 11 Gicurasi 2023, bwakiriwe bakaba bemerewe kuzakirira Police FC kuri Kigali Pelé Stadium ku wa Gatandatu tariki 20 Gicurasi 2023 Saa cyenda z’amanywa.
Uyu mukino byari biteganyijwe ko uzabera kuri Stade ya Bugesera, kwinjira byagizwe amafaranga ibihumbi 2 Frw ahasigaye hose, ibihumbi 3 Frw ahatwakiriye, ibihumbi 5 Frw mu cyubahiro n’ibihumbi 10 Frw mu cyubahiro cy’ikirenga [V.VIP].
UMUSEKE.RW