Ubuyobozi bwa Kiyovu Sports, bwakuyeho igihu ku mubano mubi uri kuvugwa muri iyi kipe nyuma y’isinya rya Niyonzima Olivier Seifu wasinye amasezerano y’umwaka umwe.
Mu ntangiriro z’iki cyumweru, ni bwo hamenyekanye amakuru avuga ko ikipe ya Kiyovu Sports, yamaze kugura umukinnyi wo hagati, Niyonzima Olivier uzwi nka Seifu.
Uyu musore wasinye amasezerano y’umwaka umwe, isinya rye ntiryavuzweho rumwe ndetse kugeza ubu amafoto ye ntiyigeze ashyirwa ku mbuga nkoranyambaga z’iyi kipe.
Hari amakuru yavugaga umubano atari mwiza hagati y’ubuyobozi bwa Kiyovu Sports Association n’ubwa Kiyovu Sports Limited, ndetse byaba byarabaye intandaro yo kutavuga rumwe kuri uyu mukinnyi.
Aganira na UMUSEKE, Mvukiyehe Juvénal uyobora Kiyovu Sports Ltd, yahakanye ibi byose kuko yemeje ko ubuyobozi bukorana neza ndetse nta kwikana kuri hagati y’izi nzego zombi.
Ati “Mwabonye ko Seifu yasinye amasezerano y’umwaka umwe. Ni umukinnyi twari tumaze iminsi mu biganiro. Kuba yasinyishijwe na Association nta makosa arimo kuko uko ibiganiro byagenze, twese twari tubizi. Dufite uko dukorana muri Kiyovu Sports.”
Yakomeje agira ati “Uyu munsi nshobora kubasinyisha, ejo mushobora kubona Umunyamabanga abasinyisha. Icya ngombwa ni uko ubuyobozi buba bwabyumvikanyehoo. Twifuza kubaka ikintu kirambye, inzego zitikekana. Nta kibazo na kimwe kirimo rwose. Hari abo muzabona basinyishwa n’abayobozi bazaba babiherewe uburenganzira.”
Abajijwe impamvu Seifu aterekanwe mu bakinnyi bashya, Mvukiyehe yavuze ko uyu mukinnyi yahawe uruhushya rw’iminsi ibiri kugira ngo azaze mu kazi yiteguye kugakora neza.
Uyu muyobozi yakomeje avuga ko mu minsi ya vuba, iyi kipe izerekana abandi bakinnyi bashya bazaba bamaze kuyisinyira amasezerano y’akazi.
- Advertisement -
Ibi birahita bikuraho urujijo ku mubano mubi wavugwaga mu nzego z’iyi kipe yo ku Mumena, aho byavugwaga ko bari kurebana ay’ingwe.
UMUSEKE.RW