Biciye mu irushanwa ryiswe B&B Burudani Mix Festival III ryateguwe n’Ikigo gitegura ibikorwa bya Siporo, B&B Sports Agency, ikipe ya Kiyovu Sports na Rayon Sports zigiye kongera kumvana imitsi mbere yo guhura muri shampiyona.
Iri rushanwa ryahuriyemo amakipe ane. Imikino ya ½ yabereye mu Karere ka Ngoma, maze Urucaca rusezerera Étoile de l’Est biciye muri penaliti 4-3 nyuma yo kunganya igitego 1-1, mu gihe Rayon Sports yasezereye AS Kigali na yo biciye muri penaliti 4-3 nyuma yo kunganya ibitego 2-2.
Ibi bisobanuye ko, aya makipe abiri y’amakeba, ari yo agomba guhurira ku mukino wa nyuma uzabera kuri Kigali Pelé Stadium ejo Saa kumi n’ebyiri z’umugoroba, mu gihe Étoile de l’Est na AS Kigali zizaba zabanje guhatanira umwanya wa Gatatu Saa cyenda z’amanywa.
Iri rushanwa rigamije gukangurira Abanyarwanda kwizigama biciye mu Kigo cya Leta cy’Iterambere, RNIT (Rwanda National Investment Trust), ryitiriwe iki Kigo n’ubundi, RNIT Savings Cup. Kwinjira kuri iyi mikino yombi, ibihumbi 2 Frw ahasigaye hose, ibihumbi 5 Frw ahatwikiriye n’ibihumbi 10 Frw mu cyubahiro.
Indi nyungu iri mu kureba iyi mikino, ni uko iyo wishyuye itike, ibihumbi 2 Frw bihita bijya mu bwizigame bwawe.
Ikipe izaba iya mbere izahembwa imidali, igikombe na miliyoni 3 Frw, iya kabiri ihembwe imidali na miliyoni 1.5 Frw mu gihe iya gatatu izahembwa imidali na miliyoni 1 Frw.
HABIMANA SADI/UMUSEKE.RW