Umunyezamu w’ikipe ya Rayon Sports, Hategekimana Bonheur, yatanze ubutumwa bugaragaza ko atewe impungenge na bamwe mu bantu biyemeje kumwanduriza bagamije kumwangisha abandi.
Ubusanzwe ni umunyezamu ukunda kugaragara yibutsa cyane ba myugariro be, ariko kenshi bamwe babifata nko kuvuga nabi nyamara nyiri ubwite ahamya ko ntawe ajya asuzugura ahubwo yanga urunuka gutsindwa.
Abicishije kuri status ya WhatsApp ye, Hategekimana Bonheur yagaragaje ko hari abantu bafashe gahunda yo kumwangisha abakunzi be ariko abibutsa ko Imana Isumba byose.
Yagize ati “Ese kunyangisha abantu ni cyo mushaka? Burya mu buzima byaba bibi cyangwa byiza, buri muntu wese ku bizera Imana bazi ko buri umwe Imana Ifite umugambi wa yo ku buzima bwe.
Yongeyeho ati “ Kuko ntiwamanura uwo uwo Imana Yazamuye kandi ntiwazamura uwo Imana Yamanuye. Byose bibaho ku Isi bitangwa n’Imana.”
Uyu munyezamu aherutse kugaragara ashyamirana n’umutoza we, Yamen Zelfani nyuma yo kwinjizwa igitego ku mukino Rayon Sports yatsinze Gasogi United ibitego 2-1 muri shampiyona.
Bonheur yakiniye amakipe arimo Kiyovu Sports, Isonga, na Espoir FC.
HABIMANA SADI/UMUSEKE.RW