Nyuma y’umunsi wa Gatatu wa shampiyona y’Abagore y’Icyiciro cya Mbere, ikipe ya Rayon Sports Women Football na AS Kigali Women Football zikomeje kuyobozwa inkoni y’icyuma na Inyemera Women Football Club y’i Gicumbi.
Ku wa Gatandatu no ku Cyumweru tariki ya 21-22 Ukwakira, habaye imikino y’umunsi wa Gatatu wa shampiyona y’Abagore y’Icyiciro cya Mbere.
Ikipe zikomeje guhangwa amaso, ni Rayon WFC na AS Kigali WFC yabonye umukeba ukomeye bazahanganira ibikombe by’uyu mwaka.
Iyi kipe yitoreza mu Nzove, ibifashijwemo na Mukandayisenga Jeannine watsinze ibitego bibiri na Mukeshimana Dorothée watsinze kimwe, yatsindiye Rambura WFC iwa yo ibitego 3-0.
Ku kibuga cya Kigali Pelé Stadium, AS Kigali WFC yahatsindiye Indahangarwa WFC ibitego 4-0.
Mu yindi mikino yabaye, Inyemera WFC y’i Gicumbi, yatsinze Freedom WFC ibitego 2-0, Kamonyi WFC itsinda Muhazi WFC igitego 1-0, APAER WFC yatsinze ES Mutunda ibitego 3-0, mu gihe Bugesera WFC yatsinze Fatima WFC ibitego 2-1.
Intsinzi y’Inyemera WFC, yatumye iyobora urutonde rwa shampiyona n’amanota icyenda, igakurikirwa na APAER WFC na yo ifite amanota icyenda na Bugesera WFC ifite icyenda.
AS Kigali WFC iri ku mwanya wa Kane n’amanota arindwi, igakurikirwa na Rayon Sports WFC banganya amanota.
Imikino y’umunsi wa Kane wa shampiyona y’Abagore y’Icyiciro cya Mbere, izakomeza mu mpera z’iki Cyumweru tariki ya 28-29 Ukwakira 2023.
- Advertisement -
HABIMANA SADI/UMUSEKE.RW