Umurundi Emmanuel Mvuyekure ‘Manu’ ukina mu kibuga hagati muri Rayon Sports, yasabye imbabazi nyuma yo gukubita umupira umusifuzi bikamuhesha ikarita y’umutuku.
Mu ijoro rya tariki ya 11 Ukwakira kuri Kigali Pelé Stadium haberaga umukino w’umunsi wa Gatandatu wa shampiyona wahuzaga ikipe ya Rayon Sports n’ikipe ya Étoile de l’Est.
Ni umukino warangiye Gikundiro itsinze ibitego bibiri kuri kimwe, ibitego bya yo byatsinzwe n’Umugande Moussa Esenu watsinze ku munota wa 33 n’uwa 43, mu gihe igitego kimwe cya Étoile de l’Est cyatsinzwe na Godspower Gabriel ku munota wa 80.
Muri uwo mukino ni ho Myuyekure Emmanuel ukina mu kibuga hagati yerekewe ikarita y’umutuku ku munota wa 64, ubwo yafataga umupira n’intoki umusifuzi Ishimwe Claude akamwereka ikarita y’umuhondo, nyuma y’amasegonda, uyu mukinnyi wa Rayon Sports agafata umupira yari afite mu ntoki akawukubita mu gatuza ka Ishimwe Claude ‘Cucuri’, nawe ntakuzuyaza agahita amwereka ikarita y’umutuku agita asohoka mu kibuga.
Myuyekure Emmanuel uzwi nka Manu wakoze iryo kosa, yagiye ku rukuta rwe rwa Instagram ajya ahandikwa ubutumwa bumara amasaha 24, asaba imbabazi umusifuzi Cucuri, abafana na abakinnyi ba Rayon Sports na FERWAFA.
Manu yanditse ati “Ni yo karita y’umutuku ya mbere mbonye kuva natangira gukina. Si byari intego yanjye gukubita umupira umusifuzi. Mbere na mbere nagira ngo ngusabe imbabazi wowe Cucuri, Ndakubaha cyane, abafana ba Rayon Sports, bakinnyi bagenzi banjye, FERWAFA. Urukundo rumwe. Tworoherane Cucuri.”
Muri iyi minsi ikipe ya Rayon Sports ikomeje kwibasirwa n’amakarita y’umutuku ihabwa kuko mu mikino ibiri uheruka yabonye amakarita y’umutuku ane.
harimo iyahawe Hértier Nzinga Luvumbu, Charles Bbaale na Mujyanama Fidele usanzwe ushinzwe Ubuzima bwa buri munsi bw’ikipe ya Rayon Sports (Team Manager) bose ku mukino wa Marines FC i Rubavu, ukongeraho iyahawe Mvuyekure Emmanuel.
Mugiraneza Thierry/UMUSEKE.RW