Ubuyobozi bw’ikipe ya Bugesera FC, bwemeje ko Nshimiyimana Eric atakiri umutoza mukuru w’iyi kipe iterwa inkunga n’Akarere ka Bugesera.
Tariki 26 Mutarama uyu mwaka, ni bwo ubuyobozi bw’ikipe ya Bugesera FC bwemeje ko bwamaze guha akazi Nshimiyimana Eric mu gihe cy’umwaka umwe n’igice.
Bisobanuye ko impande zombi zatandukanye ariko amasezerano y’uyu mutoza yari atararangira, ariko umusaruro ntiwabaye mwiza kuri uyu mutoza.
Babicishije kuri X (Twitter) kuri uyu wa Kabiri, abayobozi ba Bugesera FC bemeje ko Nshimiyimana atakiri umutoza w’iyi kipe ndetse impande zombi zabicishije mu bwumvikane.
Bati “Ku bwumvikane bw’impande zombi, ubuyobozi bw’ikipe ya Bugesera FC n’umutoza Nshimiyimana Eric baseshe amasezerano y’akazi.”
Ubuyobozi bwakomeje buvuga ko bugiye kugena abatoza basigarana inshingano zo gutoza ikipe, mu gihe hagishakwa undi mutoza mukuru.
Mu bashobora gusimbura uyu mutoza, haravugwa Haringingo Francis na Alain-André Landeut wahoze atoza Kiyovu Sports.
HABIMANA SADI/UMUSEKE.RW