Ubuyobozi bw’ikipe ya Muhazi United yo mu Ntara y’i Burasirazuba, yateguje ikipe y’Ingabo ko izasiga amanota mu Karere ka Ngoma.
Mu mpera z’iki Cyumweru, hateganyijwe imikino y’umunsi wa Cumi wa shampiyona y’Icyiciro cya Mbere y’umupira w’amaguru.
Umwe mu mikino itegerejwe, ni uzahuza ikipe ya Muhazi United izaba yakiriye APR FC kuri Stade ya Ngoma iherereye mu Karere ka Ngoma.
Uyu mukino uteganyijwe ku Cyumweru tariki ya 5 Ugushyingo 2023 Saa Cyenda n’igice z’amanywa.
Mu korohereza abakunzi ba Muhazi, ubuyobozi bw’iyi kipe bwatangaje ko ibiciro byo kwinjira ari ibihumbi 2 Frw ahasigaye hose, ibihumbi 3 Frw ahatwikiriye n’ibihumbi 5 Frw mu myanya y’Icyubahiro.
Ubuyobozi bwatangaje ko ibi biciro, bizakurikizwa mbere y’umukino ariko ku munsi w’umukino, itike yo mu Cyubahiro izava ku bihumbi 5 Frw ikajya ku bihumbi 10 Frw.
Kugura iyi tike bisaba guca mu nzira ya *929*3*1# ugakurikiriza amabwiriza.
Ubuyobozi bwa Muhazi United, bwasabye abakunzi b’iyi kipe kuzaza gushyigikira ikipe ya bo ndetse buteguza ikipe y’Ingabo ko izatakaza uyu mukino.
HABIMANA SADI/UMUSEKE.RW