Ubuyobozi bw’ikipe ya Simba SC yo muri shampiyona ya Tanzania, bwatangaje ko bwamaze gutandukana n’uwari umutoza mukuru w’iyi kipe, Roberto Oliviera Goncalves De Carmo (Robertinho).
Ni nyuma yo kunyagirwa na mukeba, Yanga Africans ibitego 5-1 mu mukino w’umunsi wa Cyenda wa shampiyona yo muri iki Gihugu.
Kuri uyu wa Kabiri tariki ya 7 Ugushyingo 2023, ubuyobozi bwa Simba SC ni bwo bwatangaje ko bwamaze gutandukana n’uwari umutoza mukuru wa yo.
Ubuyobozi bwatangaje ko, bwanasheshe amasezerano n’uwari umutoza wongerera imbaraga abakinnyi, Hategekimana Corneille.
Abatoza babiri ari bo Daniel Cadena na Seleman Matola, ni bo baba basigaranye inshingano zo gutoza ikipe mu gihe hagishakwa umutoza mukuru.
Muri iri tangazo ryatanzwe n’ubuyobozi bwa Simba SC, aba batoza bashimiwe ku mutahe wa bo batanze muri iyi kipe.
Robertinho wagiranye ibihe byiza na Rayon Sports, arayivugwamo ku yindi nshuro, cyane ko iyi kipe ikunzwe na benshi mu Rwanda, ifite umutoza w’agateganyo.
HABIMANA SADI/UMUSEKE.RW