Mu gihe imikino y’Igikombe cya Afurika iri kugana ku musozo, abatoza bari bafite amakipe y’Ibihugu, bakomeje kwirukanwa, abandi bari gusezera.
Imikino y’Igikombe cya Afurika ya 2023 iri kubera muri Côte d’Ivoire, iri gusoza iyo mu majonjora, ndetse amakipe amwe yamaze gukatisha itike ya 1/8.
Ni irushanwa ryagaragayemo gutungurana, cyane ko Ibihugu byahabwaga amahirwe yo kuzaryegukana, yatunguwe mu buryo bwatunguye benshi.
Uwabimburiye abandi, ni Umutoza w’ikipe y’Igihugu ya Gambia, Tom Saintfiet wamaze kwegura kuri izi nshingano nyuma yo gusezererwa kw’iki Gihugu mu Gikombe cya Afurika cya 2023.
Uyu mutoza yari amaze imyaka itanu n’igice ari kubaka iyi kipe y’Igihugu. Gambia yasezerewe mu Gikombe cya Afurika, nta mukino n’umwe itsinze.
Undi mutoza wahise amukurikira, ni Chris Hughton watozaga ikipe y’Igihugu ya Ghana. Uyu yamaze kwirukanwa nk’uko byemejwe n’Ishyirahamwe rya ruhago mu gihugu cya Ghana, nyuma yo gusezererwa itarenze amatsinda.
Undi mutoza waciye amarenga yo gutandukana n’ikipe y’Igihugu, ni Djamel Belmadi utoza ikipe y’Igihugu ya Algerie nyuma yo gusezererwa na Mauritanie itsinzwe igitego 1-0 mu mukino wa Gatatu wo mu itsinda rya Kane.
Amakuru ava muri iki Gihugu, avuga ko uyu mutoza yamaze gusezera ku bakinnyi bakuru ngenderwaho muri iyi kipe.
Nyuma yo kwegukana igikombe cya Afurika cya 2019, Algerie ntiyahiriwe mu Gikombe cya Afurika cya 2021 kuko yasezerewe nta mukino itsinze.
- Advertisement -
Icyo gihe yatsinzwe na Côte d’Ivoire na Guinée Equatoriale, inganya na Sierra Leone.
Muri iki Gikombe cya Afurika cya 2023 kiri kubera muri Côte d’Ivoire, yasezerewe ifite amanota abiri nyuma yo kunganya na Angola igitego 1-1 na Burkina Faso ibitego 2-2, igatsindwa na Mauritanie igitego 1-0.
Nyuma yo kugayika muri iri rushanwa, amakuru avuga ko bamwe mu bakinnyi bafite amazina muri Algerie, bashobora gutangaza ko basezeye gukinira ikipe y’Igihugu.
Nyuma y’iri rushanwa, abandi batoza bashobora kuzerekwa umuryango, abandi bagasezera kuko batageze ku nshingano za bo.
HABIMANA SADI/UMUSEKE.RW