Nyuma yo gutsindira Nasho Women Football Club iwa yo mu mukino ubanza wa 1/2 muri shampiyona y’Icyiciro cya Kabiri y’Abagore, ikipe ya Forever Women Football Club, yatanze ikimenyetso cyo kuzamuka mu Cyiciro cya Mbere.
Shampiyona y’Icyiciro cya Kabiri y’Abagore mu mupira w’amaguru, iri kugana ku musozo. Mu mpera z’iki Cyumweru, hazamenyekana ikipe ebyiri zizaba zabonye itike yo kuzamuka mu Cyiciro cya Mbere.
Imwe mu makipe afite amahirwe yo kuzamuka mu Cyiciro cya Mbere, ni Forever Women Football Club yashinzwe na Hon. Mukanoheli Saidat.
Iyi kipe ibifashijwemo na Uwera Françoise wagiye mu kibuga asimbuye ariko agatsinda igitego ku munota wa 77, Forever WFC yatsinze Nasho WFC igitego 1-0 mu mukino ubanza wa 1/2 wabereye i Nasho.
Iyi kipe itozwa na Habimana Nuru ndetse igafashwa na Kayitesi Egidie nk’Ushinzwe Ubuzima bwa buri munsi bw’ikipe, yatanze ubutumwa nyuma y’uyu mukino.
Umutoza yavuze ko yishimiye uko abakinnyi be bitwaye, kandi ko bitanga icyizere cy’uko bazanitwara neza mu mukino wo kwishyura.
Kubona iyi ntsinzi mu mukino ubanza, byongereye amahirwe ikipe ya Forever WFC yo kuba yazazamuka mu Cyiciro cya Mbere.
Undi mukino wabaye, ni uwahuje APR Women Football Club yatsinze Kayonza Women Football Club ibitego 2-1.
Imikino yo kwishyura iteganyijwe tariki ya 9-10 Werurwe 2024. Ikipe ebyiri zigeze ku mukino wa nyuma, ni zo zihita zibona itike yo kuzakina mu Cyiciro cya Mbere.
- Advertisement -
HABIMANA SADI/UMUSEKE.RW