Ikipe ya Muhazi United y’abakinnyi 10, yanganyije na APR FC igitego 1-1 mu mukino w’umunsi wa 25 wa shampiyona y’Icyiciro cya Mbere y’umupira w’Amaguru.
Kuri iki Cyumweru habaye itatu yasozaga iy’umunsi wa 25 wa shampiyona.
Umwe mu mikino yari ifite igisobanuro, ni uwahuje APR FC na Muhazi United, wabereye kuri Kigali Pelé Stadium.
Ikipe y’Ingabo ntiyari ifite Sharaf Shaiboub mu bakinnyi 11 babanjemo.
Uyu mukino watangiye Saa Cyenda z’amanywa, ikipe zombi zabanje gucungana bishingiye ku mayeri y’abatoza bombi.
Muri uko gucungana, byatumye iminota 45 irangira nta kipe ibashije kubona izamu ry’indi.
Bakigaruka mu gice cya Kabiri, ku munota wa 55, Muhazi United yahise ibona igitego cyatsinzwe na Uwumukiza Obed.
Ikipe y’Ingabo yahise imera nk’ikangutse, itangira gusatira ndetse biza kuyihira ku munota wa 69, Victor Mbaoma atsinda igitego cyo kwishyura.
Nyuma yo kubona igitego, ikipe y’Ingabo yashoboraga kubona ikindi gitego ariko ba myugariro ba Muhazi United bari beza kuri uyu munsi.
- Advertisement -
Iyi kipe y’i Burasirazuba bitewe n’igihunga cyo kugarira icunga igitego cya yo, yaje kwerekwa ikarita itukura yeretswe Ndayishimiye Richard ku munota wa 85.
Muhazi ikibona ikarita itukura, yasigaye icunga igitego cya yo, umukino urangira amakipe yombi agabanye amanota ku gitego 1-1.
Uku kunganya byatumye APR FC igira amanota 59 ndetse ikomeza kuyobora urutonde rwa shampiyona. Muhazi United yo yahise igira amanota 32 ifata umwanya wa Cyenda.
HABIMANA SADI/UMUSEKE.RW