Ikipe Gisagara y’abakina Volleyball y’Abafite Ubumuga, yatwaye igikombe cya Shampiyona ya 2023-2024 muri Sitting Volleyball mu bagabo itsinze Gasabo amaseti 3-2, mu gihe na Bugesera y’abagore yacyegukanye ku nshuro ya gatandatu yikurikiranya nyuma yo gutsinda Gicumbi amaseti 3-2 ku mukino wa nyuma.
Imikino ya nyuma yabereye kuri Stade y’Akarere ka Bugesera, ku wa Gatandatu tariki ya 23 Werurwe, hakinwa imikino ya 1/4 na 1/2 ndetse no ku Cyumweru tariki ya 24 Werurwe 2024, hakinwa imikino ya nyuma (final).
Gisagara yatwaye Igikombe cya Shampiyona itsinze Gasabo ku mukino wa nyuma ku maseti 3-2 (25-17, 22-25, 14-25, 26-24, 15-12).
Gasabo yageze ku mukino wa nyuma isezereye Rubavu muri 1/4 iyitsinze amaseti 2-0 (25-13, 25-16) , na ho muri 1/2 isezerera Rusizi iyitsinze amaseti 3-0 (25-15, 25-18 na 25-20). Rusizi yari yasezereye Nyagatare muri 1/4 ku maseti 2-0.
Gisagara yo yageze ku mukino wa nyuma ikuyemo Rwamagana muri 1/4 iyitsinze amaseti 2-0 (25-13, 25-22), mu gihe muri 1/2 yahigitse Musanze iyitsinze amaseti 3-2 (24-26, 25-15, 21-25, 25-19, 15-13). Musanze yari yageze muri 1/2 isezereye Burera muri 1/4 ku maseti 2-0.
Ikipe ya Gasabo yegukanye iki gikombe icyambuye Intwari za Gasabo zari zibitse icy’umwaka ushize.
Musanze ni yo yatwaye umwanya wa gatatu mu bagabo, itsinze Rusizi amaseti 3-0 (25-15, 25-21, 25-23).
Mu bagore ho, Bugesera ni yo yegukanye Igikombe cya Shampiyona nyuma yo gutsindira Gicumbi ku mukino wa nyuma amaseti 3-2 (14-25, 23-25, 25-21, 25-16, na 15-10).
Mu bagore ho nta mikino ya 1/4 yabayeho, ahubwo bahereye muri 1/2.
- Advertisement -
Muri 1/2 Bugesera yasezereye Musanze iyitsinze amaseti 3-0 (25-10, 25-23, 25-23), mu guhe Gicumbi yo yageze ku mukino wa nyuma isezereye Nyarugenge ku maseti 3-0 (25-12, 25-11, 25-17).
Bugesera y’abagore yegukanye Igikombe cya shampiyona ku nshuro ya gatandatu yikurikiranya kuko kuva mu 2018 ari yo ibitse ibikombe byose byakiniwe.
Mu bagore na ho Musanze ni yo yatwaye umwanya wa gatatu itsinze Nyarugenge amaseti 3-0 (25-20, 39-37, 25-21).
ISHIMWE YARAKOZE SETH KEFA/UMUSEKE.RW