Mbere yo gusoza imikino y’igice kibanza cya shampiyona y’Icyiciro cya Mbere mu mukino w’Intoki wa Volleyball, ikipe ya APR Volleyball Club, yatsinze Police VC amaseti 3-2 muri ‘derby’ y’umutekano, mu mukino w’ikirarane mu Bagabo, mu gihe APR WFC yo yatsinze RRA amaseti 3-0 mu mukino usoza iy’ibanza muri Shampiyona ya Volleyball mu Bagore.
Umukino wa APR VC wabaye ku Cyumweru tariki ya 24 Werurwe 2024, Saa Kumi z’umugoroba, muri Des Anges i Remera.
Ni umukino wari uryoheje ijisho kandi ukomeye cyane kuko amakipe yombi yakiranuwe n’iseti ya kamarampaka, birangira APR VC iyegukanye, itsinda amaseti 3-2 (23-25, 25-22, 17-25, 25-19, 15-9).
Uku gutsinda uyu mukino w’ikirarane kwatumye APR VC isoreza imikino ibanza ku mwanya wa gatatu n’amanota 20, mu gihe Police VC binganya amanota ari iya kane ku rutonde.
Imikino ibanza yasize REG VC ari yo iyoboye urutonde rwa shampiyona n’amanota 23, igakurikirwa na Kepler VC, iri mu mwaka wayo wa mbere muri shampiyona, yo ifite amanota 21. Gisagara VC ibitse Igikombe cya Shampiyona y’umwaka ushize wa 2023, ni iya Gatanu ku rutonde n’amanota 19.
Muri Shampiyona y’Abagore na ho bakinaga imikino ya nyuma isoza iy’ibanza.
Mu mukino wabereye muri Des Anges i Remera, Saa Munani z’amanywa, APR WVC yatsinze RRA amaseti 3-0 (25-19, 25-15, 25-22).
Mu yindi mikino yabaye mu bagore, EAUR yatsinze IPRC Kigali amaseti 3-0 (25-20, 25-22, 25-13), mu gihe Police na yo yatsinze Ruhango amaseti 3-0 (25-20, 25-12, 25-12).
Ku rutonde rwa shampiyona mu bagore, APR isoje imikino ibanza ari iya mbere n’amanota 13, mu gihe Police iyigwa mu ntege n’amanota 12.
- Advertisement -
Imikino yo kwishyura, haba mu bagabo no mu bagore, iteganyijwe gutangira ku wa Gatanu tariki ya 29 Werurwe 2024.
ISHIMWE YARAKOZE SETH KEFA/UMUSEKE.RW